1 ओ प्रभु, कऊँ तूँ दूर खड़ेया रा रएया?

मुसीबता रे बखते लूकेया रा कऊँ रएया?

2 दुष्टा रे कमण्डो रिया बजा तेई माणूं खदेड़े जाओए;

सेयो आपणी ई निकयाल़िया रिया योजना रे फसी जाओए।

3 कऊँकि दुष्ट माणूं आपणी इच्छा पाँदे कमण्ड करोआ

ओर लाल़ची माणूं प्रभुए खे छाडी देओआ ओर तेसखे स्राप देओए।

4 दुष्ट माणूं परमेशरो री कोई परवा नि करदे;

आपणे कमण्डो रिया बजा ते सेयो सोचोए कि परमेशर नि आ।

5 एड़ा लगोआ कि सेयो हमेशा सफल ओए, ओर सेयो नि सोचदे कि तिना खे तिना रे ई कामो री सजा मिलणी, ओर सेयो आपणे दुश्मणा रा मजाक उड़ांदे रओए।

6 से आपणे मनो रे बोलोआ, "आऊँ कदी असफल नि ऊई सकदा;

आऊँ कदी बी मुसीबता रे नि पड़ना।"

7 तेसरे मुंए रे बोल स्राप, छल ओर तमकिया साथे परे ए,

तिना रे मुंए ते सिर्फ अनर्थ ओर उत्पातो रिया गल्ला निकल़ोईया।*

8 से निर्दोष लोका री अत्या करने रिया तँईं आपू खे गाँवो दे लकोई राखोआ,

सेयो लाचार लोका री अत्या करने रा मौका टोल़दे रओए।

9 से शेरो जेड़ा जाड़ो बीचे लूकी की घात लगाई की ताका रे बैठेया रा रओआ,

से दु:खी माणूंए खे पकड़ने री ताका रे रओआ।

से दु:खी माणूंए खे आपणे जाल़ो रे फसाई की कसिटी की ल्याओआ ओर तेबे तेसखे दबोची लओआ।

10 लाचार माणूं चूकी जाओआ ओर से कट्ठा ऊई की बैठोआ

ओर से तेसरे जाल़ो रे फसी जाओए।

11 दुष्ट माणूं आपणे मनो रे बोलोआ, "परमेशर मेरी परवा नि करदा,

तिने आपणियां आखी बन्द करिती रिया ओर तेस आँऊ कदी नि देखणा।"

12 ओ परमेशर, उठ! तिना दुष्टा खे सजा दे

ओर जो सीदे ए, तिना खे याद राख।

13 दुष्ट माणूं परमेशरो खे तुच्छ कऊँ जाणोआ

ओर आपणे मनो रे बोलोआ, "तेस माखे सजा नि देणी?"

14 पर तूँ तिना परेशानिया ओर संकटो खे देखेया जो तिना रे जरिए ओए।

जो लाचार लोक दु:खी ए,

सेयो उम्मीद करोए कि तुसा तिना री मताद करनी;

ओर तुसे अनाथा री मताद बी करोए।

15 दुष्ट ओर बुरे माणूंआ री तागत खत्म कर,

जो दुष्ट काम तिने कित्ते, तिजी खे तिना खे तदुए तक सजा देंदा रओ

जदुए तक सेयो एड़े कामा खे करना बंद नि करी देओ।

16 यहोवा, तूँ सदा खे म्हारा राजा ए,

पर दुष्ट जातिया रे लोक तरतिया पाँदा ते नाश ऊई जाणे।*

17 ओ प्रभु, तूँ सीदे लोका री प्रार्थना खे सुणेया

ओर तिना खे ईम्मत देंदा रएया।

18 तूँ अनाथ ओर दु:खी माणूंआ री रक्षा करेया

ताकि माणूं फेर कदी बी दूजेया खे डराई नि सको।