परमेशरो रा प्यार
दाऊदो रा पजन
1 ओ मेरे मन, प्रभुए खे तन्य बोल ओर जो कुछ मांदे ए,
से तेसरे पवित्र नाओं खे तन्य बोलो!
2 ओ मेरे मन, प्रभुए खे तन्य बोल
ओर तेसरे केसी उपकारो खे नि पूलेया!
3 सेई तो तेरे सारे पाप माफ करोआ
ओर तेरी सारिया बमारिया खे ठीक करोआ।
4 यहोवा ई माखे मरने ते बचाओआ,
ओर साथे ई माखे प्यार ओर दया री आशीष देओआ,
5 सेई मेरे जीवनो खे खरिया चीजा ते परी देओआ,
कि आऊँ उकाब पंछिये जेड़ा जवान ओर तागतबर बणया रा रऊँ।103:5 यशायाह 40:31
6 यहोवा सारे दु:खी कमजोर माणूंआ री खातर तर्म
ओर न्याय रे काम करोआ।
7 तिने मूसे खे आपणी योजना बताई
ओर इस्राएलिया री ल्वादा पाँदे आपणे काम प्रगट कित्ते।103:7 पजन 147:19
8 प्रभु दयालु ओर कृपा करने वाल़ा, देरा ते गुस्सा करने वाल़ा
ओर बऊत ई करूणा करने वाल़ा ए।103:8 पजन 86:15, पजन 145:8
9 तेस सदा बकदे ई नि रणा,
ना ई तेसरा गुस्सा सदा खे पड़केया दा रणा।
10 तिने म्हारे पापो रे मुताबिक आसा साथे बर्ताव नि कित्तेया
ओर ना ई म्हारे बुरे कामा रे मुताबिक आसा ते बदला लया।
11 सर्ग तरतिया पाँदे जितणा ऊच्चा ए,
तितणी ई तेसरी महान करूणा तेसरे पग्ता पाँदे ए।
12 पूर्व पच्छमा ते जितणा दूर ए,
तिने म्हारे पाप आसा ते तितणे ई दूर करीते रे।
13 जेड़ी दया बाओ आपणे बाल़का पाँदे करोआ,
प्रभु बी आपणे पग्ता पाँदे तेड़ी ई दया करोआ।
14 कऊँकि से म्हारी रचना जाणोआ कि आसे किंयाँ बणी रे
ओर तेसखे याद ए कि माणूं माट्टी ईए।
15 माणूंए री उम्र काओ जेड़ी ओई,
से मैदानो रे फूलो जेड़ा फूलोआ;
16 जो पऊण लगदे ई ठईरी नि सकदा
ओर ना ई से आपणी जगा रे फेर मिलदा।
17 पर तिना खे जो यहोवे रा आदर करोए, तेसरी करूणा सदा तक बणी दी रणी,
ओर तेसरी पलाई पीढ़िया ते पीढ़िया तक बणी रणी।103:17 लूक 1:50
18 जो तेसरी वाचा खे पूरा करोए
ओर तेसरे उपदेश याद करी की तिना खे मानोए।
19 प्रभुए तो आपणा सिंहासन स्वर्गो रे स्थिर करी राखेया
ओर तेसरा राज्य पुरिया सृष्टिया पाँदे ए।
20 ओ प्रभुए रे स्वर्गदूतो, तुसे जो महान शक्तिशाली ए
ओर तुसे जो तेसरा वचन सुणी की तिजी रे मुताबिक काम करोए,
प्रभुए खे तन्य बोलो!
21 ओ प्रभुए री सारी स्वर्गिय सेना,103:21 स्वर्गदूत
तेसरी इच्छा खे पूरी करने वाल़े सारे सेवको, प्रभुए खे तन्य बोलो!
22 ओ प्रभुए री सारी सृष्टि,
तेसरे राज्य री सारिया जगा रे प्रभुए खे तन्य बोलो।
ओ मेरे मन, तूँ प्रभुए खे तन्य बोल!