दुश्मणा रे खलाफ मतादा री प्रार्थना
दाऊदो रा पजन
1 ओ यहोवा, मेरा दिल तांदे ई लगेया राए;
मां गीत गाणा, मां आपणी आत्मा ते बी पजन गाणा।
2 मां आपणी सारंगी, आपणी बीणा चकणी!
ओर सूरजो रे निकल़णे ते पईले मां संगीत बजाणा!
3 ओ प्रभु, मां देशो-देशो रे लोका बीचे तेरा तन्यवाद करना
ओर राज्य-राज्य रे लोका बीचे तेरा पजन गाणा।
4 कऊँकि तेरी करूणा सर्गो ते बी ऊच्ची ए
ओर तेरी सच्चाई सर्गो तक महान ए।
5 ओ परमेशर, स्वर्गो पाँदे आपणी महानता प्रकट कर
ओर तेरी महिमा सारी तरतिया पाँदे ओ!
6 तूँ आपणियां तागती ते आसा खे बचाई लओ
ओर म्हारी बिनती सुणी लओ, कि जिना लोका ते तूँ प्यार करेया सेयो उद्धार पाओ!
7 परमेशरे आपणी पवित्रता रे ऊई की बोली राखेया, "मां खुश ऊई की शकेम शईर बांडी लणा
ओर सुक्कोतो री काअटी नपवाणी।
8 गिलाद प्रदेश मेरा ए, मनश्शे बी मेरा ए;
ओर एप्रैम मेरे शरण लणे री जगा ए,
यहूदा प्रदेश मेरा राजदण्ड ए।
9 मोआब मेरे तोणे रा पांडा ए, एदोम देश मेरे पैरा निठे ऊणा,
पलिश्ती देशो पाँदे मां जयजयकार करनी।"
10 ओ परमेशर, आऊँ गढ़वाल़े शईरो रे केस पऊँचाणा?
कुण माखे एदोमो तक लई जाओगा?
11 ओ परमेशर, क्या तैं आसे छाडी नि दित्ते
ओर ओ परमेशर, तूँ म्हारी सेना साथे कऊँ नि चलदा।
12 दुश्मणा रे खलाफ म्हारी मताद कर,
कऊँकि माणूंआ री मताद तो बेकार ए!
13 परमेशरो री मतादा ते आसा वीरता दखाणी,
कऊँकि म्हारे दुश्मण तेसी ई आपणे पैरा निठे केसणे।