पजन 110

परमेशर ओर तेसरा चूणेया रा राजा

दाऊदो रा पजन

1 यहोवे मेरे प्रभुए ते बोलेया, "तूँ मेरे दाँणे बैठ,

जदुओ तक आऊँ तेरे दुश्मणा खे तेरे पैरा री चौकी नि बणाई देऊँ।"*110:1 इब्रानी 10:12,13, लूक 20:42,43

2 यहोवे तेसते बोलेया, "मां तेरी शक्ति एक राजे रे रूपो दे सिय्योनो ते लई कि दूजिया जगा तक बढ़ाणी।

ओर तां आपणे दुश्मणा पाँदे राज करना।"

3 तेरिया प्रजा रे लोक तेरे पराक्रमो रे दिने आपणी इच्छा ते आपू खे अर्पित करोए;

तेरे जवान लोक पवित्र पाह्ड़ो पाँदे तड़के रे पाल़े जेड़े तांगे ए।

4 यहोवे आपू वादा कित्तेया से तीजी ते पीछे नि आटणा, जेड़ा तिने बोलेया,, "तूँ मलिकिसिदको रिया रीतिया पाँदे सदा खे पुरोईत ए।" *110:4 इब्रानी 7:21, इब्रानी 7:17

5 यहोवा तेरे दाँणियां तरफा खे ए,

तेस आपणे गुस्से रे दिने राजे चूर करी देणे।*110:5 पजन 143:5

6 तेस जातिया-जातिया रा न्याय करना,

रणभूमि मुड़देया साथे परी जाणी;

तेस लाम्बे चौड़े देशो रे परदान चूर-चूर करी देणे।

7 तेस बाटा रिये चली की चरने रा पाणी पीणा

ओर तेबे तेस जीतणे ते बाद आपणा सिर ऊच्चा करना।