परमेशरो रे महान कामा रिया तँईं स्तुति
बजाणे वाल़े परदानो रिया तँईं गीत, पजन
1 ओ सारी तरतिया रे लोको,
परमेशरो रा खुशिया साथे जयजयकार करो;
2 तेसरे नाओं री महिमा रा पजन गाओ,
तेसरी स्तुति करदे ऊए, तेसरी महिमा करो।
3 परमेशरो खे बोलो, "तेरे काम कितणे नौखे ए!
तेरी महान सामर्था रिया बजा ते तेरे दुश्मण तां सामणे कुटणे टेकोए।
4 सारी तरतिया रे लोका तेरी आराधना करनी
ओर तिना तेरी तारीफा रा पजन गाणा;
तिना तेरे नाओं री तारीफा रा पजन गाणा।" सेला
5 परमेशरे जो काम कित्ते तिना कामा खे आई की देखो;
से आपणे कामा रिया बजा ते माणूंआ खे डराऊणा दिशोआ।
6 तिने समुद्र सूकिया जमीना दे बदली ता;
लोके पैदल ई चली की नदिया टपी तिया;
इजी री खातर आओ आसे प्रभुए रे कित्ते रे कामा रिया बजा ते तेसदे खुश ओऊँए।
7 जो आपणियां शक्तिया ते सदा राज करोआ
ओर आपणी आखी साथे देशा-देशा खे ताकोआ।
इजी खे जो लोक तेसरी गल्ल नि मानदे सेयो बिद्रोह करने वाल़े आपणे सिर तेस सामणे नि चको।
8 ओ देशो-देशो रे लोको म्हारे परमेशरो री स्तुति करो
ओर तेसरी स्तुतिया री आवाज सारिया जगा दे सुणने देओ।
9 तिने आसे सई-सलामत राखी राखे
ओर म्हारे पैर खड़ीसणे नि दित्ते।
10 कऊँकि ओ परमेशर तैं आसे परखी राखे;
जिंयाँ चाँदी शुद्ध कित्तेया जाओआ तिंयाँ तैं आसे शुद्ध कित्ते।66:10 1 पत 1:7, यशायाह 48:10
11 तैं आसे मुसीबता दे पड़ने दित्ते
ओर म्हारिया पीठी पाँदे पारी बोजा राखेया था;
12 तैं म्हारे दुश्मण म्हारे सिरो पाँदिए चलणे दित्ते,
आसे आग ओर पाणिए बीछीए ऊई की गये;
पर तैं आसे तारी की तेते जगा बीचा ते सुखो साथे परी ते।
13 मां होमबलि लई की तेरे मईलो रे आऊणा;
मां ताखे आपणी मान्नता चढ़ाणियां,
14 मुसीबता रे बखते मैं जो मान्नत मानी थी,
से मां ताखे देणी।
15 खाडूआ री चर्बिया रा खुशबू वाल़े तूपो समेत मां ताखे मोटे डांगरा री होमबलि, चढ़ाणी;
मां ताखे बाकरेया समेत बल़द चढ़ाणे। सेला
16 ओ परमेशरो ते डरने वाल़ेयो, आओ ओर सुणो!
मां तुसा खे बताणा कि परमेशरे मेरिया तँईं क्या-क्या करी राखेया।
17 मैं से पुकारेया
ओर मैं तेसरा ई गुणगाण कित्तेया।
18 जे आऊँ आपणे मनो रे अनर्थ गल्ला सोचदा,
तो प्रभु मेरी नि सुणदा।66:18 यूह. 9:31, नसी 15:29
19 पर परमेशरे तो मेरी दुहाई सुणी;
तिने मेरी प्रार्थना रिया तरफा खे त्यान देई राखेया।
20 तन्य ए परमेशर, जिने ना तो मेरी प्रार्थना अणसुणी कित्ती
ओर ना आपणी करूणा मांते दूर कित्ती।