1 ओ यहोवा, तूँ राजा ए देशो-देशो रे लोक तांते थूरने लगी रे!

तूँ करूबा पाँदे बैठी की राज करेआ, तरती ईलणे लगी!*

2 यहोवा सिय्योनो* रे महान ए

ओर से देशो-देशो रे लोका पाँदे परदान ए।

3 सारे लोक प्रभुए रे महान् ओर डरो जोगे नाओं रा तन्यवाद करो!

से पवित्र ए।

4 राजे री सामर्थ न्याय साथे मेल राखोई,

तैंई सच्चाईया री स्थापना करी राखी;

न्याय ओर तार्मिकता इस्राएलो दे तैंई शुरू कित्ती।

5 म्हारे प्रभु परमेशरो री सराईणा करो;

ओर तेसरे पैरा री चौकिया सामणे माथा टेको!

से पवित्र ए!

6 मूसा ओर हारूण प्रभुए रे पुरोईत थे;

प्रभुए ते प्रार्थना करने वाल़ेया बीचे शमूएल था

तिने प्रभु पुकारेया ओर प्रभुए तिना खे उत्तर दित्तेया।

7 से बादल़ो रे खम्बे रे ऊई की तिना साथे गल्ला करो था

ओर सेयो तेसरी चतौणिया ओर तेसरी दित्ती री बिदिया पाँदे चलो थे।

8 ओ म्हारे यहोवा, तूँ तिना री सुणी लये था;

तैं तिना रे पाप माफ कित्ते,

पर तिना रिया गल़तिया रिया तँईं तिना खे सजा बी दित्ती।

9 म्हारे प्रभु परमेशरो री सराईणा करो,

ओर तेसरे पवित्र पाह्ड़ो पाँदे जाई की आराधना करो;

कऊँकि म्हारा प्रभु परमेशर पवित्र ए!