1 प्रभुए रा तन्यवाद करो, कऊँकि से पला ए

ओर तेसरी करूणा सदा री ए।

2 यहोवा जो सबी देवतेया पाँदे शासन करोआ,

तेसरी करूणा सदा री ए।

3 सबी ते बड़े पराक्रमी यहोवे रा तन्यवाद करो,

तेसरी करूणा सदा री ए।

4 प्रभुए ते अलावा कोई बड़े-बड़े अचम्बे रे काम नि करी सकदा,

तेसरी करूणा सदा री ए।

5 तिने आपणी समजा साथे सर्ग बणाया,

तेसरी करूणा सदा री ए।

6 समुद्रो पाँदे तरतिया खे फैलाणे वाल़े रा तन्यवाद करो,

तेसरी करूणा सदा री ए।

7 तिने सूरज ओर चाँद बणाए, तेसरी करूणा सदा री ए।

8 तिने दिनो पाँदे राज करने रिया तँईं सूरज बणाया,

तेसरी करूणा सदा री ए

9 ओर राती पाँदे राज करने रिया तँईं चाँद ओर तारे बणाए,

तेसरी करूणा सदा री ए।

10 तिने मिस्री लोका रे जेठे बच्चे काईते,

तेसरी करूणा सदा री ए

11 ओर तिने इस्राएली लोक मिस्रिया ते बचाए,

तेसरी करूणा सदा री ए।

12 तिने आपणी नौखी सामर्था ते सेयो निकयाल़े,

तेसरी करूणा सदा री ए।

13 तिने लाल समुद्रो रे दो इस्से करीते,

तेसरी करूणा सदा री ए

14 तिने इस्राएली लोक समुद्रो रे बीचा-बिछिए पार करीते,

तेसरी करूणा सदा री ए।

15 पर तिने राजा फिरौन तेसरिया सेना समेत लाल समुद्रो बीचे डबोई ता,

तेसरी करूणा सदा री ए।

16 तिने आपणे निज लोका री सुनसाण जगा रे अगुवाई कित्ती,

तेसरी करूणा सदा री ए।

17 तिने बड़े-बड़े राजा मारे,

तेसरी करूणा सदा री ए।

18 तिने प्रतापी राजा बी काये,

तेसरी करूणा सदा री ए;

19 तिने एमोरिया रे राजा सिहोन,

तेसरी करूणा सदा री ए।

20 ओर बाशानो रा राजा ओग मारेया,

तेसरी करूणा सदा री ए।

21 तिना री जगा तिने आपणियां प्रजा खे दित्ती,

तेसरी करूणा सदा री ए;

22 तिने से जगा इस्राएलो खे जो तेसरा आपणा दास ए तिना खे दित्ती;

तेसरी करूणा सदा री ए।

23 प्रभुए आसा रिया बुरिया दशा रे म्हारी सम्बाल़ लई,

तेसरी करूणा सदा री ए;

24 ओर म्हारे बैरिया ते आसे छुड़ाई राखे,

तेसरी करूणा सदा री ए।

25 से सबी प्राणिया खे खाणे खे खाणा देओआ,

तेसरी करूणा सदा री ए।

26 स्वर्गो रे परमेशरो रा तन्यवाद करो,

तेसरी करूणा सदा री ए।