पजन 7

न्याय रिया तँईं प्रार्थना

दाऊदो रा शिग्गायोन नाओं रा पजन जो तिने बिन्यामीनी कूशो रिया गल्ला रिया बजा ते प्रभुए रे सामणे गाया

1 ओ मेरे प्रभु परमेशर! मेरा परोसा तां पाँदे ए आँऊ तेरी शरणा रे आई रा,

मेरा पीछा करने वाल़ेया ते माखे बचा ओर तिना ते माखे बचाई दे,

2 एड़ा नि ओ कि सेयो माखे शेरो जेड़े फाड़ी की टुकड़े-टुकड़े करी देओ

ओर कोई माखे बचाणे वाल़ा नि ओ।

3 ओ मेरे प्रभु परमेशर! जे मैं कोई गल़त काम कित्तेया ओ,

जे मेरे आथो ते कोई बुरा काम ऊईरा ओ,

4 जे मैं आपणे केसी दोस्तो ते तोखा कित्तेया ओ;

जे मैं बिना बजा ते आपणे दुश्मणा पाँदे बी जुल्म कित्तेया ओ;

जे मैं इना बिचा ते एक बी गल़ती कित्ती ओ,

5 तो मेरे दुश्मण मेरे प्राणो रा पीछा करी की माखे आई की पकड़ो,

बल्कि सेयो मेरी बेज्जती करी की माखे काई देयो, ओर माखे जमीना दे मरेया दा समजी की सेटी देयो। सेला

6 ओ प्रभु, गुस्से रे उठ; गुस्से ते परे मेरे सताणे वाल़ेया रे खलाफ तूँ खड़ा ऊई जा;

ओ परमेशर, मेरी खातर जाग! तैं न्याय री आज्ञा तो देईती री।

7 तूँ देशो-देशो रे लोका रे चूण्डो खे आपणे चऊँ कनारिये कट्ठे कर;

ओर तूँ स्वर्गो ते तिना पाँदे राज कर।

8 प्रभु जातिया-जातिया रे लोका रा न्याय करोआ;

प्रभु मेरी तार्मिकता ओर खराईया रे मुताबिक मेरा न्याय कर; कऊँकि आँऊ निर्दोष ए।

9 तूँ एक तर्मी परमेशर ए ओर म्हारे विचार ओर इच्छा रा न्याय करेया।

दुष्टा रिया दुष्टता खे रोक ओर तर्मिये खे ईनाम दे।

10 परमेशर मेरी रक्षा ईंयाँ करोआ जिंयाँ एक ढाल सिपाईए री रक्षा करोई,

से तिना सबी लोका खे बचाओआ जो तर्मी ए।

11 परमेशर तर्मी ओर न्याय करने वाल़ा ए

से बुरेया माणूंआ खे हर रोज सजा देओआ।

12 जे माणूं आपणे बुरे कामा ते मन नि फिराओ तो तेस आपणी तलवारी पाँदे सान चढ़ाणी

ओर युद्ध करने रिया तँईं आपणा धनुष त्यार करना।*7:12 लूक 13:3-5

13 ओर तेस माणूंए खे तिने मौता रे अथियार त्यार करी लये रे,

से आपणे तीरा खे आगी रे बाण बणाओआ।

14 देख, दुष्टो खे अनर्थ कामो रिया पीड़ा ऊणे लगी रिया,

तेसरे बुरे कामा रा गर्भ ए ओर तेसते चूठ पैदा ऊआ,

15 तिने गड्डा खणी की से ओर डूगा कित्तेया

ओर से आपू ई तेते गड्डे रे रूड़ी गा जो तिने खणेया था।

16 तिना आपू तेसा परेशानिया रा अनुभव करना जो सेयो दूजेया खे पैदा करना चाओए;

सेयो जो दूजेया खे लड़ाई चगड़ेया रिया चीजा करना चाओए, सेयो आपू ई तिने की काईल ऊणे।

17 आऊँ यहोवे री तारीफ करूँआ कऊँकि से हमेशा ठीक काम करोआ;

मां यहोवे री तारीफ करने खे गीत गाणा, जो केसी बी दूजेया देवतेया रे मुकाबले परमपरदान ए।