पजन 72

तर्मी राजे रा राज्य

सुलैमानो रा गीत

1 ओ परमेशर, राजे खे आपणे न्याय रे नियम बता,

राजे रे पाऊए खे आपणा तार्मिकता देई दे!

2 ताकि से तेरी प्रजा रा न्याय तार्मिकता साथे

ओर तेरे दु:खी लोका रा न्याय बिना पक्षपातो ते करो।*72:2 मत्ती 25:31-34, प्रेरित 17:31, रोमी 14:10, 2 कुरिन्थ 5:10

3 पाह्ड़ ओर पाह्ड़िया ते प्रजा रे लोका खे तर्मो रे शान्ति मिलणी।

4 तेस राजे प्रजा रे दु:खी लोका रा न्याय करना

ओर गरीब लोक बचाणे ओर अन्देर करने वाल़े चूर करने।*72:4 यशायाह 11:4

5 जदुए तक सूरज ओर चाँद बणे रे रणे,

तदुए तक पीढ़िया-पीढ़िया रे तेरेया लोका तेरा डर मानदे रणा।

6 राजा डोरूआ दे बर्खा जेड़ा आशीषा री बजा ओ,

जमीना दे पड़ने वाल़ी बर्खा जेड़ा ओ जो जमीना खे सिंजोई।

7 म्हारे राजे रे दिना रे तार्मिक माणूं फल़णे-फूलणे

ओर जदुए तक चाँद बणेया रा रणा तदुए तक बऊत शान्ति रणी।

8 तेसरा राज्य एकी समुद्रो ते लई कि दूजे समुद्रो तक

ओर फरात नदिया ते लई की तरतिया रे दूजे कनारे तक ऊणा।

9 सुनसाण जगा रे रणे वाल़े लोक तेस सामणे जानूआ रे पारे चुकणे

ओर तेसरे दुश्मणा माट्टी चाटणी।

10 तर्शीश ओर टापूआ-टापूआ रे राजेया पेंट ल्याऊणी,

शेबा ओर सबा दुँईं जगा रे राजेया तोफे पऊँचाणे।

11 सबी राजेया तेसगे माथा टेकणा,

देशो-देशो रे लोका तेरी सेवा करनी।*72:11 प्रकाशित 21:26, मत्ती 2:11

12 कऊँकि राजे दुहाई देणे वाल़े गरीब लोक

ओर दु:खी ओर बिना साअरे माणूं बचाणे।

13 तेस कंगाल़ ओर गरीबो पाँदे तरस खाणी

ओर गरीबा री जिन्दगी बचाणी।

14 तेस तिना रे प्राण अन्देर ओर उपद्रव करने वाल़ेया ते छुड़ाई लणे

ओर तिना रा जीवन तेसरी नजरा रे कीमती ए।*72:14 तीतुस 2:14

15 से तो जिऊँदा रणा ओर शेबा रे सूईने बीचा ते तेसखे देणा।

लोका तेसरिया तँईं हर रोज प्रार्थना करनी

ओर पूरा दिन तेसरिया तँईं आशीष मांगणी।

16 देशो रे बऊत सारा नज्ज ऊणा

ओर पाह्ड़ा रिया चूँडिया पाँदे फसला रे डोरू लईराणे।

जेतेरे सिल्ले लबानोनो रे देवदारा रे डाल़ा जेड़े

ओर शईरो रे रणे वाल़े लोक काओ जेड़े लईराणे।

17 राजे रा नाओं सदा-सर्वदा बणेया रा रणा;

जदुए तक सूरज बणेया रा रणा, तदुए तक तेसरे वंशो रे लोका राज करना

ओर लोका आपू खे तेसरी बजा ते तन्य मानणा।

सारे देशो रे लोका तेसखे तन्य बोलणा।

18 इस्राएलो रा प्रभु परमेशर तन्य ए;

तिने ई अचम्बे रे काम कित्ते।*72:18 पजन 136:4

19 राजे रा महिमा ते परेया रा नाओं सदा तन्य रणा

ओर सारी तरती तेसरी महिमा साथे परी जाणी। आमीन् फेर आमीन्।

20 यिशै रे पाऊ दाऊदो री प्रार्थना खत्म ऊई गी।