1 मां हर बखत प्रभुए खे तन्यवाद बोलेया करना;

तेसरी स्तुति लगातार मेरे मुंए ते ऊँदी रणी।

2 मां यहोवे रे कामा रिया तँईं तेसरी स्तुति करनी;

ताकि सीदे लोक ये सुणी की खुश ओ।

3 मां साथे प्रभुए री तारीफ करो ओर आओ,

आसे मिली की तेसरे नाओं री स्तुति करूँए!

4 मैं परमेशर यहोवे ते प्रार्थना कित्ती, तेबे तिने मेरी सुणी ली

ओर तिने आऊँ मेरे सारे डरो ते छुड़ाईता।

5 जिने तेसरी तरफा खे देखेया तिने जोति पाई

ओर सेयो कदी शर्मिंदा नि ऊए।

6 इने दु:खी माणूंए यहोवा पुकारेया तेबे तिने तेसरी प्रार्थना सुणी ली,

ओर प्रभुए से तेसरी सारी मुसीबता ते छुड़ाई ला।

7 जो लोक प्रभुए री पग्ती करोए,

तिना खे प्रभुए रा दूत चऊँ कनारे ते केरा पाई की तिना खे खतरेया ते बचाओआ।*

8 परखी की देखो कि प्रभु कितणा पला ए!

से मर्द बऊत ई तन्य ए जो तेसरी शरण लओआ।*

9 ओ प्रभुए रे पवित्र लोको, प्रभुए ते डरो।

जो लोक प्रभुए ते डरोए तिना खे किजी बी चीजा री कमी नि ऊँदी!

10 जवान शेरा खे तो कमी ऊई जाओई

ओर सेयो पूखे बी रयी जाओए;

पर जो लोक प्रभुए खे टोल़ोए तिना खे किजी बी खरिया चीजा री कमी नि ऊणी।

11 ओ बाल़को, आओ, मेरी गल्ल सुणो,

मां तुसा खे प्रभुए री पग्ती करनी सिखाणी।

12 से कुण माणूं ए जो जिऊणे री इच्छा राखोआ

ओर लाम्बी उम्र चाओआ ताकि पलाई देखी सको?

13 आपणी जीबा खे बुराई करने ते रोकी की राख

ओर आपणे मुंए री चौकसी राख

ताकि तिजी ते छल-कपटो री कोई गल्ल नि निकल़ो।*

14 बुराईया ते दूर रओ, ओर जो खरा ए सेई कर!

हमेशा कड़ी मईणत कर ताकि लोक एकी-दूजे साथे शान्तिया दे रई सको।*

15 यहोवे रिया आखी तर्मिया पाँदे लगी री रओईया

ओर तेसरे कान बी तेसरी बिनतिया रिया तरफा खे लगे रे रओए।*

16 पर यहोवा तिना लोका रे खलाफ ए जो बुरे काम करोए।

ओर तिना रे मरने ते बाद, लोक तिना खे पुरिया तरआ ते पूली जाणे।*

17 जेबे तार्मिक माणूं दुहाई देओए तेबे प्रभु सुणोआ

ओर तिना खे सबी मुसीबता ते बचाओआ।

18 प्रभु पश्चाताप करने वाल़ेया री सुणने ओर मताद करने रिया तँईं त्यार रओआ

ओर दु:खी आत्मा वाल़े माणूंए खे बचाओआ।

19 तार्मिक माणूंए पाँदे बऊत सारिया मुसीबता तो पड़ोईया,

तेबे बी प्रभु तेसखे तिना सबी ते बचाओआ।*

20 प्रभु तेसरी सारिया आड्डिया खे सई-सलामत राखोआ

ओर तिना बीचा ते एक पनि टूटदी।*

21 दुष्ट माणूं आपणी बुराईया रिया बजा ते नाश ऊई जाणा

ओर जो लोक तार्मिक माणूंए ते कृणा करोए सेयो दोषी ठईरने।

22 यहोवे तिना रे प्राण बचाणे जो तेसरी सेवा करोए।

ओर जो तेस पाँदे परोसा राखोए,

तिना बीचा ते तेस कोई बी दोषी नि ठराणा।