1 प्रभु, मां तेरी करूणा रे बारे दे सदा गांदे रणा;

मां आपणे मुंए ते तेरी सच्चाई पीढ़िया ते पीढ़िया तक बतांदे रणा।

2 कऊँकि मैं बोली राखेया, "तेरी करूणा सदा बणी री रणी,

तां स्वर्गो रे आपणी सच्चाई बणाई री राखणी।"

3 तैं बोलेया, "मैं आपणे चूणे रे राजे साथे वाचा बानी राखी,

मैं आपणे दास दाऊदो ते ये कसम खाई राखी,

4 मां दाऊदो रे वंशो बीचा ते एक हमेशा खे राजा बनाणा;

ओर तेरी राजगद्दी पीढ़िया ते पीढ़िया तक बणाई री राखणी।"

5 ओ प्रभु, स्वर्गो रे तेरे नौखे कामा री,

ओर पवित्र लोका री सबा रे तेरी सच्चाईया री तारीफ ऊणी।

6 कऊँकि सर्गो रे यहोवे जेड़ा कोई पनि आ।

स्वर्गदूता बीचे यहोवे जेड़ा कोई पनि आ।

7 परमेशर पवित्र लोका री सबा रे बऊत जादा प्रतिष्ठा जोगा ए,

से आपणे चऊँ कनारे रणे वाल़ेया बीचे सबी ते जादा डरो जोगा ए।*

8 ओ प्रभु, स्वर्गिय सेनाओं रे परमेशर यहोवा, तां जेड़ा योद्धा कोई पनि ए।

ओ प्रभु, तेरे चऊँ कनारे तेरी सच्चाई ए!

9 समुद्रो रे गर्वो खे तूँई तोड़ेया; जेबे तिजी रिया लईरा उठोईया,

तेबे तूँई तिना खे शांत करी देया।

10 तैं समुद्रो रे राक्ष राहाबो खे थाले मांडी की काईता,

तैं आपणे पराक्रमो ते आपणे दुश्मण अराईते।*

11 सर्ग तेरा ए, तरती बी तेरी ए; दुनिया ओर जो कुछ तिदे ए,

से तैंई बणाई राखेया।*

12 उत्तर ओर दक्खण तैंई बणाई राखे;

ताबोर ओर हेर्मोन पाह्ड़ तेरे नाओं री जयजयकार करोए।

13 तेरिया बांयी तागतबर ए; तेरा आथ शक्तिया साथे परेया राए

ओर तेरा दाँणा आथ प्रबल ए।

14 तार्मिकता ओर न्याय तेरे सिंहासनो रे मूल़ ए;

करूणा ओर सच्चाई तांते आगे-आगे चलोईया।

15 सेयो लोक बऊत ई तन्य ए जो त्योआरो री खुशिया खे जाणोए;

ओ प्रभु, सेयो लोक तेरे मुंए री जोतिया रे प्रयासे साथे हांडोए,

16 आसे हमेशा हर रोज खुश रऊँए,

तेरिया तार्मिकता रिया तँईं आसे तेरी जयजयकार करूँए।

17 तूँई तिना री तागती री शोभा ए,

ओर तेरिया खुशिया ते म्हारा सिर ऊच्चा ऊई जाणा।

18 म्हारी ढाल प्रभुए रिया तरफा ते ए;

म्हारा राजा इस्राएलो रे पवित्र परमेशरो रिया तरफा ते ए।

19 तैं पुराणे बखतो रे आपणे पग्तो खे दर्शण देई की

ये बोलेया था, "मैं मताद करने री जिम्मेबारी एकी तागतबर मर्दो पाँदे राखी ए।

मैं प्रजा बीचा ते एक मर्द चूणी राखेया ओर से बढ़ाई राखेया।

20 मैं आपणे दास दाऊदो खे लई की,

आपणे पवित्र तेलो साथे तेसरा अभिषेक करी राखेया।*

21 मेरी तागत हमेशा तेस साथे रणी,

ओर मेरिया तागती से मजबूत बनाणा।

22 तेसरा दुश्मण तेसखे अराई नि सकणा,

ओर ना ई बुरे माणूं तेसखे दु:ख देई सकणे।

23 मां तेसरे दुश्मण तेस सामणे नाश करने,

ओर तेसरे बैरिया पाँदे मुसीबता पाणिया।

24 पर मेरी सच्चाई ओर करूणा तेस साथे बणी री रणी,

ओर मेरे नाओं रे जरीये तेसरा सींग ऊच्चा ऊई जाणा।

25 मां तेसरे राज्य भूमध्य सागरो ते लई कि फरात नदिया तक फलाणा।

26 तेस माखे आका पाई की बोलणा, ‘तूँ मेरा पिता ए,

मेरा परमेशर ओर माखे बचाणे री चट्टान ए।’*

27 तेबे मां से आपणा जेठा पाऊ,

ओर तरतिया रे राजेया पाँदे परदान बनाणा।*

28 मां आपणी करूणा तेस पाँदे सदा बणाई री राखणी,

ओर मेरी वाचा तेसखे अटल़ रणी।

29 तेसरा खानदान मां कदी बी खत्म नि ऊणे देणा

ओर तेसरे खानदानो ते एक सदा खे राजे रे सिंहासनो पाँदे बैठणा।

30 जे तेसरे वंशो रे लोक मेरे बिधानो खे छाडो

ओर मेरे नियमा रे मुताबिक नि चलोगे,

31 जे सेयो मेरे बिधि-बिधानो खे नि मानोगे,

ओर मेरिया आज्ञा खे नि मानोगे,

32 तेबे मां तिना रे पापा री सजा तिना खे देणी;

तिना रिया गल़तिया रिया तँईं तिना दु:ख पुगतणा पड़ना।

33 पर मां आपणी करूणा तेस पाँदा ते नि टाणी,

ओर ना आपणी सच्चाई चूठी बणने देणी।

34 ना मां आपणा वादा तोड़ना,

ओर ना आपणे मुंए ते निकल़े रे शब्द बदल़ने।

35 आँऊ सदा खे आपणी पवित्रता री कसम खाई चुकेया रा;

मां दाऊदो खे कदी तोखा नि देणा।

36 तेसरा वंश सदा चलदा रणा,

ओर तेसरी राजगद्दी सूरजो जेड़ी मां सामणे चमकदी रणी।*

37 से चाँदो जेड़ा सदा बणेया रा रणा;

ये गवाई सर्गो रे बणी री ए।"

38 प्रभु, तेबे बी तैं आपणा अभिषिक्त राजा छाडीता

ओर से मानेया नि, तैं आपणे अभिषिक्त राजे पाँदे बऊत गुस्सा कित्तेया।

39 तैं आपणे दासो साथे बानी री वाचा छाडी ती,

ओर तेसरा मुकुट जमीना दे सेटी की अशुद्ध करिता।

40 तैं तेसरे शईरो रिया सारिया दवाला तोड़ी तिया,

ओर तेसरे गढ़ खण्डहर बणाईते।

41 सब बाटा दे आऊँदे जांदे लोक जो चाओ तन-दौलत लूटी लओए,

ओर तेसरे नेड़े तेड़े रे देशो रे लोक तेसरा मजाक उडाओए!

42 तैं तेसरे बरोदी तागतबर बणाए;

ओर तेसरे सारे दुश्मण खुश करी राखे।

43 तैं तेसरे अस्त्र-शस्त्र बेकार करीते ए,

ओर से अराईता रा ए।

44 तैं तेसरा राजदण्ड तेसरे आथो ते छीनी ला,

ओर तेसरा सिंहासन जमीना दे सेटी ता।

45 तैं तेसरी जवानी कटाई ती,

ओर से आरने री शरमा साथे टखी ता रा। सेला

46 ओ प्रभु, तां कदुओ तक लगातार मूँ फेरी की राखणा,

कदुओ तक तेरा गुस्सा आगी जेड़ा पड़कदे रणा।

47 ओ प्रभु, माखे याद कर, कि मेरी जिन्दगी थोड़ी जी तो अए,

तैं सारे माणूं बेकारो रेई कऊँ बणाई राखे?

48 एड़ा कुण माणूं ए जो सदा खे जिऊँदा रओ ओर मौता खे नि देखो?

क्या कोई आपणे आपू खे कब्रा दे जाणे ते बचाई सकोआ? सेला

49 ओ यहोवा, केई ए तेरी पुराणे बखतो री करूणा

जेतेरी कसम तैं आपणे दास दाऊदो साथे सच्चाईया ते खाई थी?

50 ओ यहोवा, आपणे दासो खे याद कर! लोक मेरे बारे दे मजाक करोए,

ओर माखे बऊत बेज्जती सईन करनी पड़ोई।

51 ओ यहोवा, तेरे दुश्मण तेरे चूणे दे राजे री बेज्जती करोए!

सेयो जेती बी जाओए तेसरी बेज्जती करोए।

52 प्रभु जुगो-जुगो तक तन्य रणा! आमीन् फेर आमीन्।