1 ओ देशो-देशो रे लोको, खुशिया साथे चाड़िया बजाओ!

ऊच्चिया आवाजा रे परमेशरो री जयजयकार करो!

2 कऊँकि प्रभु, परमपरदान परमेशर डरो जोगा ए;

से सारी तरतिया रा महान राजा ए।

3 तिने म्हारे दुश्मणा रे खलाफ लड़ाई जीती ली ए,

ओर तेसा जातिया रे लोक म्हारे कब्जे दे ए।

4 तिने आसा खे ये जमीन छाँटी जेती एबे आसे रऊँए;

आसे इस्राएली लोक जिना खे से प्यार करोआ, कमण्ड ए कि आसे एस देशो रे मालक ए। सेला

5 जेबे लोक जयजयकार करोए ओर रड़सिंगे बजाओए,

तेबे परमेशर आपणे सिंहासणो पाँदे विराजमान ओआ।*

6 परमेशरो रा पजन गाओ, पजन गाओ!

म्हारे महाराजे रा पजन गाओ, पजन गाओ!

7 कऊँकि परमेशर सारी तरतिया रा महाराजा ए,

तेसरा पजन गायी कि जय-जयकार करो।

8 परमेशर देशा-देशा पाँदे राज करोआ;

परमेशर आपणे पवित्र सिंहासनो पाँदे बैठी रा।*

9 अब्राहमो रे परमेशरो री प्रजा बणने रिया तँईं राज्य-राज्य रे शासक लोक कट्ठे ऊई रे।

कऊँकि तरतिया री ढाला परमेशरो रे वशो रेईया, से तो शिरोमणि ए!