1 ओ तर्मियो, प्रभुए दे खुश रओ,

स्तुति करना तर्मी लोका खे शोभा देओआ।

2 बीणा बजाई-बजाई की प्रभुए रा तन्यवाद करो,

दस तारा वाल़ी सारंगी बजाई-बजाई की प्रभुए रा पजन गाओ।*

3 यहोवे रिया तँईं नया गाणा गाओ,

जयजयकार करदे ऊए ठीक-टंगो रे बाजे बजाओ।*

4 कऊँकि प्रभुए रा वचन सच्चा ए

ओर तेसरे हर काम सच्चाईया साथे पूरे ओए।

5 से तार्मिकता ओर न्याय साथे प्यार राखोआ;

प्रभुए री करूणा साथे तरती परी री ए।

6 प्रभुए आपणियां आज्ञा ते सर्ग बणाया।

सूरज, चाँद ओर तारे आपणे शब्दा रे जरिए बणाए।*

7 प्रभु समुद्रो रा पाणी एकी जगा कट्ठा करोआ मानो केसी पांडे रे कट्ठा करी राखेया,

ओर से डूगे समुद्रो खे आपणे पण्डारो रे राखोआ।

8 सारी तरतिया रे लोक प्रभुए री आराधना करो,

दुनिया रे सब रणे वाल़े तेसरा आदर करो!

9 कऊँकि जेबे परमेशरे बोलेया, तेबे दुनिया बणीगी थी;

जेबे तिने आज्ञा दित्ती, तेबे सब कुछ दिशणे लगेया।

10 प्रभु जातिया-जातिया री सलाई खे बेकार करी देओआ;

से देशो-देशो रे लोका री इच्छा खे निष्फल करी देओआ।

11 प्रभुए री योजना जुगो-जुगो तक बणी री रणी;

तेसरे मनो रे बचार पीढ़िया ते पीढ़िया तक बणे रे रणे।

12 से देश बऊत ई तन्य ए

जेसरा परमेशर प्रभु ए ओर सेयो लोक,

जो प्रभुए आपणी जायदात ऊणे खे चूणी ले रे!

13 प्रभु स्वर्गो ते देखोआ,

से सबी माणूंआ खे देखदा रओआ;

14 से तेसा जगा ते जेती से सिंहासणो पाँदे बैठेया राए,

तरतिया पाँदे रणे वाल़ेया सबी खे देखदा रओआ,

15 सेई तिना सबी रे दिला खे जाणोआ

ओर तिना रे सबी कामा री जाँच-पड़ताल़ करोआ।

16 राजे री जीत तेसरी बऊत सारी सेना ते नि ऊई सकदा;

वीर मर्दो री विजय तेसरी आपणी बड़ी शक्तिया ते नि ऊँदी।

17 युद्धो रे जीतणे रिया तँईं कोड़ेया पाँदे परोसा करना बेकार ए,

से आपणी बऊत तागत ऊणे रिया बजा ते केसी खे बचाई नि सकदा।

18 देखो, प्रभु आपणे पग्ता पाँदे नजर राखोआ जो तेसरी आज्ञा खे मानोए

ओर तिना पाँदे जो तेसरी करूणा री उम्मीद राखोए,

19 ताकि से तिना रे प्राण मौता ते बचाओ,

ओर अकाल़ो रे बखते तिना खे जिऊँदा राखो।

20 आसे आपणी उम्मीद प्रभुए पाँदे लगाई राखी;

सेई म्हारा रक्षक ए ओर म्हारी मताद करोआ।

21 म्हारा मन यहोवे रिया बजा ते खुश ऊणा,

कऊँकि आसे तेसरे पवित्र नाओं पाँदे परोसा राखी राखेया।

22 ओ प्रभु, जिंयाँ तां पाँदे म्हारी उम्मीद ए,

तिंयाँ ई तेरी करूणा आसा पाँदे ओ।