पजन 57

छुटकारे रिया तँईं प्रार्थना

बजाणे वाल़े रे परदानो रिया तँईं अल-तशहेत रागो दे दाऊदो रा मिक्ताम; जेबे से शाऊलो गे ते नठी की गुफा रे लूकी गा था।

1 ओ परमेशर, मां पाँदे दया कर, मां पाँदे दया कर,

कऊँकि आऊँ तेरी ई शरणा रे आई रा ओर जदुए तक यो बिपदा टल़ी नि जाओ,

तदुए तक मां तेरे पंखा री छाया रे शरण लई की रणा।

2 मां तां परमपरदान परमेशरो ते प्रार्थना करनी,

जिने मेरी सारिया जरूरता पुरिया करी राखिया ए।

3 परमेशरो स्वर्गो ते ज्वाब देणा, ओर आऊँ बचाई लणा,

ओर जो माखे दु:ख देओए तिना पाँदे तूँ मुसीबत पाएया। सेला,

तेरी दया मां पाँदे अटल ए, ओर तूँ सच्चा ओर परोसे जोगा ए।

4 आँऊ एड़ेया माणूंआ बीचे रऊँआ जो शेरा जेड़े खूंखार ए,

आँऊ धधकदी आगी बीचे सुतुआं;

मतलब एड़े माणूंआ बीचे जिना रे दाँद बड़छे ओर तीर ए

ओर जिना री जीब तेज तलवारा जेड़ी ए।

5 ओ परमेशर, तूँ स्वर्गो पाँदे बऊत महान ओर तेजोमय ए,

तेरी महिमा सारी तरतिया पाँदे फैली जाओ!

6 मेरे दुश्मणे माखे पकड़ने खे जाल़ फैलाई राखेया;

आऊँ बऊत जादा दु:खो दे पड़ीगा दा ए। सेला

7 ओ परमेशर, मेरा परोसा तां पाँदे अटल ए,

ओर मां जय-जयकार करदे ऊए तेरे गीत गाणे!

8 आऊँ एबे जागणा! मां आपणी सारंगी ओर आपणा बीणा चकी लणा।

सूरजो रे निकल़दे ई मां गीत सुनाणा!

9 ओ प्रभु, मां देशो-देशा रे लोका बीचे तेरी सराईणा करनी;

मां राज्य-राज्य रे लोका बीचे तेरा पजन गाणा।

10 कऊँकि तेरी करूणा इतणी महान ए कि स्वर्गो रे पऊँचोई ऊच्चाईया तक

ओर तेरी सच्चाई सर्गो तक पऊँचोई।

11 ओ परमेशर, तूँ सर्गो पाँदे आपणी महानता प्रकट कर!

तेरी महिमा सारी तरतिया पाँदे फैली जाओ!