सृष्टि करने वाल़े री स्तुति
1 आऊँ आपणे आपू ते बोलूँआ, "यहोवे री स्तुति करो!"
यहोवा, मेरे परमेशर, तूँ बऊत महान ए!
तूँ एक महान राजे रे रूपो दे अक्को साथे शासन करेआ।
2 तूँ प्रयासे खे चाद्दरी जेड़ा टखी राखोआ
ओर सर्गो खे तम्बूए जेड़ा ताणी की राखोआ,
3 तैं आपणे कअरो रे खम्बे बन्दे पाणिए पाँदे खड़े करी राखे।
ओर बादल़ा खे आपणा रथ बणाओआ
ओर पऊणी रे पंखा पाँदे सवारी करोआ,
4 तूँ पऊणी खे आपणे दूत ओर धधकती आगी खे
आपणी सेवा करने वाल़े दूत बणाओआ।104:4 इब्रानी 1:7
5 तैं तरती तिजी रिया निऊँआ पाँदे खड़ी करी राखी,
ताकि से जुगो-जुगो तक नि डगमगाओ।
6 तैं तरती टाल्ले जेड़ी गईरे पाणिए साथे टखी ती;
पाणिए पाह्ड़ चूँडिया तक टकी ते दे।
7 तेरे डांटणे ते समुद्र नठीगा,
तेरे गिड़ने री आवाज सुणदे ई से अड़बड़िया साथे बह्यींदा चलीगा।
8 पाणी पाह्ड़ा पाँदिए चढ़ी की बह्यींदा ऊआ काअटिया रिया बाटा ते तेते जगा रे उतरी गा,
जो तैं तेसखे त्यार करी की ठराई राखेया।
9 तैं पाणिए खे एक बन्ना ठराया, जेतेखे से लंगी नि सकदा
ओर ना फिरी की मैदानो खे टखी सकोआ।
10 तूँ चरनेया खे काअटिया रे बाह्या,
सेयो पाह्ड़ा बीचे बह्ओए,
11 तिना ते मैदानो रे सारे जीव-जन्तु पाणी पियोए,
बणो रे गह्दे बी आपणी त्याय मटयाई लओए।
12 तेसा नदिया रे कनारे डाल़ा दे
पंछी रणे खे कोअले बणाओए ओर गीत गांदे रओए।104:12 मत्ती 13:32
13 तूँ आपणी रणे रिया जगा दे ऊबा ते पाह्ड़ा पाँदे बरखा करदा रएया,
तेरे कामा रे फलो ते तरती सन्तुष्ट रओई।
14 तूँ डांगरा खे काआ ओर माणूंआ रे कामा रिया तँईं नज्ज पैदा करेया
ओर ईंयाँ जमीना ते माणूं खाणे रिया चीजा पैदा करोआ,
15 ओर अंगूरा रा रस जेते की माणूंआ रा मन खुश ऊई जाओआ
ओर मुंए खे चमकाणे रिया तँईं तेल, ओर नज्ज,
जेते साथे तेसखे तागत मिलोई।
16 प्रभुए रे डाल़ जो तिने लगाई राखे,
लबानोन प्रदेशो रे देवदारा रे डाल़ पाणिए साथे तृप्त रओए।
17 तिना दे चिड़िया आपणा कोअला बणाओईया;
सारसो रा बसेरा केली रे डाल़ा रे ओआ।
18 जंगल़ी बाकरेया खे ऊच्चे पाह्ड़ ए
ओर चट्टानी शापाना री रणे रिया जगा ए।
19 तिने ठराए रे बखतो खे चाँद बणाया;
सूरज आपणा छपणे रा बखत जाणोआ।
20 तूँ न्हेरा करेया, तेबे रात ऊई जाओई;
जिदे बणो रे सारे जीव-जन्तु कूमो-फिरोए।
21 जवान शेर शकारो रिया तँईं गुर्राओए
ओर परमेशरो ते आपणा शकार माँगोए।
22 त्याड़ा निकल़दे ई सेयो चली जाओए
ओर आपणियां गुफा रे जाई की बैठी जाओए।
23 तेबे माणूं आपणे कामा रिया तँईं,
साँजा तक मईणत करने खे निकल़ोआ।
24 ओ यहोवा, तेरे काम अणगिणत ए!
यो सब चीजा तैं आपणी अक्ला साथे बणाई राखिया;
तेरे जरिए बणाई रिया सारिया चीजा ते तरती परिपूर्ण ए।
25 ईंयाँ ई समुद्र कितणा बड़ा ओर बऊत ई चौड़ा ए
ओर तिदे अणगिणत पाणिए बीचे लूरने वाल़े जीव-जन्तु,
छोटे-बड़े सारे परी रे।
26 तिदे पाणिए बीचे चलणे वाल़े जाह्ज बी आओ जाओए
ओर लिब्यातान104:26 लिब्यातान समुद्रो दे रणे वाल़ा दानव बी, जो तैं तिदे खेलणे रिया तँईं बणाई राखेया।
27 इना सबी खे तेरा ई आसरा ए,
ताकि तूँ इना खे बखतो-बखतो पाँदे खाणे खे देया करे।
28 जेबे तूँ तिना खे खाणे खे देओआ तेबे सेयो तिजी खे कट्ठा करी लओए;
जेबे तूँ आपणी मुट्ठी खोलेया तेबे सेयो खरिया चीजा साथे रजी जाओए।
29 जेबे तूँ तिना ते आपणा मूँ फेरी लएया;
तेबे सेयो कबराई जाओए; जेबे तूँ तिना रा साआ वापस लई लएया
तेबे सेयो मरी जाओए ओर माट्टिया रे फेर मिली जाओए।
30 फेर तूँ आपणा आत्मा104:30 साआ पेजेया तेबे सेयो पैदा कित्ते जाओए
ओर तरती तिना साथे फेर परी जाओई ओर नवीं बणी जाओई।
31 प्रभुए री महिमा सदा ऊँदी रओ,
प्रभु आपणे कामे की खुश ओ!
32 से तरतिया पाँदे नजर करोआ
ओर तरती थरथराई जाओई ओर तेसरे पाह्ड़ा खे छूँदे ई पाह्ड़ा ते तुआँ निकल़ोआ।
33 जदुए तक आँऊ जिऊँदा ए, मां प्रभुए रिया तँईं गीत गांदे रणा,
जदुए तक आऊँ बणेया रा रणा तदुए तक मां आपणे परमेशरो रा पजन गांदे रणा।
34 मेरा त्यान करना प्रभुए खे प्यारा लगो,
कऊँकि आऊँ तो प्रभुए रिया बजा ते खुश रणा।
35 पापी लोका रा तरतिया पाँदा ते अन्त ऊई जाणा,
ओर दुष्ट लोक आगो खे नि रणे!
ओ मेरे मन प्रभुए खे तन्य बोल! यहोवे री स्तुति करो!