पजन 12

मतादा रिया तँईं प्रार्थना

परदान बजाणे रिया तँईं खर्जो रे रागो रे दाऊदो रा पजन

1 ओ प्रभु, म्हारी मताद करो, कऊँकि एक बी पग्त नि रया;

माणूंआ बीचा ते परोसे जोगे लोक लोप ऊईगे रे।

2 हर एक माणूं आपणे पड़ोसिया ते चूठिया गल्ला बोलोआ,

सेयो चलाकिया रे ओठा ते दोगलिया गल्ला बोलोए।

3 प्रभुए सबी रे चलाक ओठ

ओर से जीब जेसा ते बड़ा बोल निकल़ोआ, बाडी देणे।

4 सेयो बोलोए, "चूठ बोली कि आसा खे सेई मिलणा जो आसे चाऊँए;

आसे आपू ये सोचूँए कि आसा क्या करना चाईयो,

इजी री खातर कोई बी आसा खे ये नि बोली सकदा

आसा खे क्या नि करना चाईयो!"

5 पर यहोवा ईंयाँ बोलोआ, "मैं सेयो चगड़े वाल़िया चीजा देखिया जो तिने बेसहारा लोका साथे करी राखिया;

ओर मैं सेयो लोक कणदे ऊए सुणी राखे,

इजी री खातर मां उठणा ओर सेयो लोक बचाणे

जो चाओए कि आऊँ तिना री मताद करुँ।"

6 प्रभुए रा वायदा परोसे जोगा ए,

तेस चाँदिए जेड़ा, जो पट्ठिया रे माट्टिया पाँदे गल़ाई की

सात बार साफ करी राखेया ओ।

7 ओ प्रभु, तां ई सेयो बचाणे,

तिना खे एड़ेया दुष्ट लोका ते सदा बचाई की राख।

8 जेबे माणूंआ बीचे बुराईया रा आदर ओआ,

तेबे दुष्ट लोक चऊँ कनारे अकड़ोए।