1 यहोवे री जयजयकार करो! मां यहोवे रा आपणियां मण्डल़िया रे सामणे;

सीदे मनो ते यहोवे रा तन्यवाद करना।

2 प्रभुए रे काम महान ए, जितणे तिना ते खुश रओए,

सेयो तिना खे टोल़ोए।*

3 जो बी यहोवा काम करोआ, से काम महान ई ओए,

तेसरी न्याय करने री तार्मिकता सदा री ए।

4 प्रभुए आपणे अचम्बे रे काम याद करवाई राखे;

प्रभु दया करने वाल़ा ओर अनुग्रह करने वाल़ा ए।

5 तिने आपणे पग्ता खे रोटी खाणे खे देई राखी;

तेस आपणी वाचा सदा खे याद राखणी।

6 यहोवे देशो-देशो रा अक्क आपणे लोका खे देई की

आपणे कामा री शक्ति तिना पाँदे प्रकट करी राखी।

7 यहोवे रे काम सच्चाई ओर न्याय ए;

तेसरे सारे उपदेश परोसा करने जोगे ए।

8 तेसरे उपदेश सदा खे रओए;

तिना खे सच्चाई ओर तार्मिकता दे दित्ते थे।

9 परमेशरे आपणे लोक गुलामिया ते आजाद कित्ते ओर तिना साथे हमेशा रा वादा कित्तेया।

से पवित्र ओर आदरो जोगा ए।*

10 प्रभुए री पग्ती करना बुद्धिया री शुरूआत ए;

जितणे तेसरी आज्ञा खे मानोए, तिना खे अच्छी समज मिलोई।

प्रभुए री स्‍तुति सदा कित्ती जाणी।