1 प्रभुए रा तन्यवाद करो, कऊँकि से पला ए

ओर तेसरी करूणा सदा री ए!

2 प्रभुए रे छुड़ाए रे लोक,

जो तिने दुश्मणा रे आथो ते मोल देई की छुड़ाई लये रे,

3 ओर जो तिने देशो-देशो ते, पूर्व-पच्छम, उत्तर-दक्खणो ते कट्ठे करी राखे,

सेयो प्रभुए रा तन्यवाद करो।*

4 तिना देशा ते वापस आऊणे वाल़ेया बीचा ते कुछ सुनसाण जगा दे पटकी गे;

सेयो राची गे थे ओर तिना गे रणे खे कोई शईर नि था।

5 पूख ओर त्यायी री बजा ते

सेयो कमजोर ऊईगे।

6 तेबे तिने मुसीबता रे बखते प्रभुए री दुहाई दित्ती

ओर प्रभुए सेयो मुसीबता ते छुड़ाए;

7 ओर सेयो ठीक बाटा रिये चलाए,

ताकि सेयो बसणे खे केसी शईरो रे जाई की पऊँचो।

8 लोक प्रभुए री करूणा रिया बजा ते

ओर तिना अचम्बे रे कामा रिया बजा ते,

जो से माणूंआ री खातर करोआ, तेसरा तन्यवाद करो!

9 से त्याया खे पीणे खे बऊत पाणी देओआ

ओर पूखेया खे खरिया चीजा साथे रजाओआ।*

10 कुछ न्हेरे ओर मौता री छांयी रे बैठी रे थे

ओर दु:खो रे पड़े रे ओर बेड़िया साथे जकड़ी रे थे,

11 कऊँकि सेयो परमेशरो रे वचना रे खलाफ चले

ओर परमपरदानो री सलाह् तुच्छ जाणी।

12 तेबे प्रभुए तिना खे इतणा कष्ट दित्तेया कि सेयो ठोकर खाई की रूड़ीगे

ओर तिना खे कोई बी मताद करने वाल़ा नि मिलेया।

13 तेबे तिने आपणी मुसीबता रे प्रभुए री दुहाई दित्ती

ओर प्रभुए सेयो एसा बिपदा ते छुड़ाए;

14 तिने सेयो अन्दकूप न्हेरे ते बारे निकाल़ी की ल्याया

ओर तिना रिया बेड़िया तोड़ी तिया।

15 लोक प्रभुए री करूणा रिया बजा ते

ओर तिना अचम्बे रे कामा रिया बजा ते,

जो से माणूंआ खे करोआ, तेसरा तन्यवाद करो!

16 प्रभुए पीतल़ी रे द्वार तोड़े

ओर लोए रिया छड़ा रे टुकड़े-टुकड़े करीते।

17 मूर्ख आपणी बुरी चाल

ओर बुरे कामा रिया बजा ते बऊत दु:खी ओए।

18 सेयो कुछ बी खाणा नि चाँदे

ओर सेयो मरने रे बऊत नेड़े थे

19 तेबे तिने आपणी मुसीबता रे बखते प्रभुए री दुहाई दित्ती

ओर प्रभुए सेयो मुसीबता ते बचाए।

20 प्रभु तिना खे आपणे वचनो रे जरिए तन्दरूस्त करोआ

ओर विनाशो ते तिना री रक्षा करोआ।*

21 लोक प्रभुए री करूणा रिया बजा ते

ओर तिना अचम्बे रे कामा रिया बजा ते,

जो से माणूंआ रिया तँईं करोआ, तेसरा तन्यवाद करो!

22 ओर सेयो तन्यवादो री बलि चढ़ाओ

ओर जयजयकार करदे ऊए, तेसरे कामा रा बखाण करो।

23 जो लोक जाह्जो दे समुद्रो दे हांडोए

ओर महासागरो पाँदे ऊई की बपार करोए;

24 सेयो प्रभुए रे कामा खे

ओर तिना अचम्बे रे कामा खे जो सेयो गईरे समुद्रो रे करोआ, देखोए।

25 प्रभुए आज्ञा दित्ती, ओर तूफान आया,

जेतेते लईरा ऊठणे लगिया।

26 जाह्ज सर्गो तक ऊच्चे चकीते

ओर फेर गईराईया तक थाले त्वारी ते।

ईंयाँ मुसीबता दे तिने आपणी ईम्मत छाडी ती,

27 सेयो लड़खड़ाई गे ओर शराबिया रे नशे जेड़े डगमगाणे लगे

ओर तिना री सारी बुद्धि नाश ऊई जाओई।

28 तेबे सेयो मुसीबता रे बखते प्रभुए री दुहाई देओए

ओर से तिना खे बिपदा ते बचाई लओआ।

29 प्रभु तूफानो खे बंद करी देओआ

ओर लईरा शान्त ऊई जाओईया।

30 लईरा रे शान्त ऊणे रिया बजा ते सेयो खुश थे

ओर से तिना खे तेते बन्दरगाह रे सई-सलामत लई आए

जेती सेयो जाणा चाओ थे।

31 लोक प्रभुए री दया री बजा ते

ओर तिना अचम्बे रे कामा रिया बजा ते,

जो से माणूंआ रिया तँईं करोआ, तेसरा तन्यवाद करो।

32 ओर सेयो लोका रिया मण्डल़िया दे तेसरी सराईणा करो

ओर बुजुर्गा रिया बैठका दे तेसरी स्तुति करो।

33 यहोवा नदिया खे सुनसाण जगा बणाई देओआ

ओर पाणिए रे चरनेया खे सूकी जमीन बणाई देओआ।

34 से तेती रणे वाल़ेया रिया दुष्टता रिया बजा ते

पजणे वाल़ी जमीना खे बंजर बणाई देओआ।

35 से सुनसाण जगा खे पाणिए रे खाल़ा दे

ओर सूकिया जमीना खे पाणिए रे चरनेया दे बदली देओआ।

36 तेबे से तेती पूखेया खे बसाई देओआ,

ताकि सेयो बसणे रिया तँईं शईर त्यार करो;

37 ओर फसल-बाड़ी लगाओ ओर अंगूरा रे बगीचे लगाओ

ओर पांतिया-पांतिया रे फल़ पैदा करो।

38 यहोवा आपणियां प्रजा खे आशीष देओआ ओर तिना रे बऊत बाल-बच्चे ओए,

यहोवा तिना रे डांगरा खे बी से कम नि ऊणे देंदा।

39 जेबे परमेशरो रे लोक अन्देर, बिपदा ओर दु:खो रिया बजा ते,

आरे ओर बेज्जत ऊए,

40 यहोवे तिना पाँदे अन्देर करने वाल़ेया खे तुच्छ जाणेया,

ओर सेयो सुनसाण जगा रे पटकाईते;

41 पर यहोवा गरीबा खे दु:खो ते छुड़ाई की तिना री तरक्की करोआ

ओर तिना रे टब्बरो खे पेडा रे चूण्डा जेड़ा बऊत बढ़ाई देओआ।

42 सीदे माणूं ये देखी की बऊत खुश ओए;

ओर सब बुरे माणूं आपणा मूँ बंद करी देओए।

43 जो अक्लमंद ओ, से इना सबी गल्ला पाँदे त्यान देओ

ओर लोक प्रभुए री करूणा पाँदे बचार करो।