1 ओ मेरे परमेशर! ओ मेरे परमेशर!

तैं आऊँ कऊँ छाडीता?

तूँ मेरी मताद कऊँ नि करदा?

तूँ मेरी पुकार कऊँ नि सुणदा? तूँ माखे कऊँ नि बचांदा?

2 ओ मेरे परमेशर! आऊँ ताखे दिने आका पाऊँआ,

पर तूँ ज्वाब नि देंदा

ओर राती बी आऊँ‍ चुप नि रंदा।

3 पर तूँ तो इस्राएलो री स्तुतिया रे सिंहासणो पाँदे विराजमान ए,

तूँ तो पवित्र परमेशर ए।

4 म्हारे बुजुर्ग तां ई पाँदे परोसा राखो थे;

सेयो परोसा राखो थे

ओर तूँ तिना खे खतरेया ते बचाए था।

5 तिने तूँई पुकारेया ओर तैं सेयो छुड़ाए

ओर सेयो तां ई पाँदे परोसा राखो थे

ओर सेयो कदी शर्मिंदा नि ऊए।

6 पर तैं आऊँ नि बचाया,

लोक माखे नबाग समजोए ओर तिना रा बचार ए कि आऊँ एक माणूं नि आ,

पर एकी कीड़े जेड़ा बेकार ए!

7 माखे देखणे वाल़े सब जणे मेरा मजाक उडाओए

ओर ओठ चबाओए

ओर सिर ईलाई की ओर मेरी बेजती करोए ओर बोलोए,*

8 "से यहोवे पाँदे परोसा करोआ ओर बोलोआ,

कि यहोवा तेसते बऊत खुश ए;

जे एड़ा ए, तो सेई एसखे छुड़ाओ ओर मताद करो!"*

9 से तूँई था जिने आऊँ गर्भो ते निकयाल़ेया;

जेबे आऊँ दूद पींदा बच्चा था,

तदुए तेई तैं माखे परोसा राखणा सिखाया।

10 आऊँ जन्मो तेई तांगे सम्बाल़ी ता था,

माया रे गर्भो तेई तूँई मेरा परमेशर रया।

11 मांते दूर नि ओ कऊँकि मुसीबत नेड़े ए

ओर कोई मेरी मताद करने वाल़ा नि ए।

12 मेरे दुश्मण बणो रे बल़दा रे चूण्डो जेड़े मेरे चऊँ कनारे ए।

सेयो बाशान देशो रे साँडा जेड़े बऊत तागती वाल़े ए ओर तिने मेरे चऊँ कनारे केरा पाई राखेया।

13 सेयो फाड़ने ओर गरजणे वाल़े शेरो जेड़े ए,

तिने मेरी तरफा खे आपणा मूँ खोली राखेया।

14 आऊँ पुरिया तरआ ते थकी गा रा

ओर मेरी सारी आड्डिया रे जोड़ उखड़ी गे;

आऊँ एबे ये उम्मीद नि करदा कि परमेशर माखे बचाओगा;

ये उम्मीद पुरिया तरआ ते चली गी री ए जिंयाँ मोम जो गल़ी गा रा ए।

15 मेरी तागत टूटे रे माट्टिया रे पांडे जेड़ी सूकी गी ए,

ओर मेरी जीब मेरे ताल़ूए साथे चिपकी गी ए।

परमेशर, तैं आऊँ छाडीता रा ए कि आऊँ मरी की माट्टिया दे मिली जाणा।*

16 मेरेया दुश्मणे आऊँ चऊँ कनारा ते केरी ला कटणे वाल़े कुत्तेया रे चूण्डो जेड़ा,

तिने मेरे आथ-पैर कटी ते दे।*

17 आऊँ आपणी एक-एक आड्डी गिणी सकूँआ;

मेरे दुश्मण माखे कूरदे ऊए मेरा मजाक उडाणे लगी रे।

18 तिने मेरे टाल्ले आपू बीचे बांडी ले

ओर मेरे टाल्लेया पाँदे चिट्ठी पाई।*

19 पर ओ प्रभु तूँ दूर नि रओ!

ओ मेरी मताद करने वाल़े, बिना देर कित्ते मेरी मताद कर!

20 तलवारी ते ओर कुत्ते रे पंजे ते मेरे प्राणो खे बचाई लओ!

21 माखे शेरो रे मुंए ते बचा,

जंगल़ी सांडो रे सींगा ते तैं आऊँ बचाई ला रा।

22 मां आपणे इस्राएली पाईया सामणे तेरे नाओं रा प्रचार करना;

सभा बीचे मां तेरी तारीफ करनी।*

23 ओ यहोवे रा डर मानणे वाल़ेयो, तेसरी स्तुति करो!

ओ याकूबो रे वंशो रे लोको तुसे सब तेसरी महिमा करो!

ओ इस्राएलो रे वंशो रे लोको, तेसरी पग्ती करो!*

24 कऊँकि प्रभुए दु:खी माणूंए रा बेज्जती नि कित्तेया

ओर ना तेसते कृणा कित्ती ओर ना तेस दु:खी माणूंए ते आपणा मूँ लकोया;

पर जेबे तिने माणूंए प्रभुए री दुहाई दित्ती, तेबे तिने तेसरी सुणी ली।

25 बड़ी सभा रे मेरा स्तुति करना तेरिया ई तरफा ते ओआ;

मां तेरे पग्ता रे सामणे आपणी मान्नत पूरी करनी।

26 नम्र लोक रोटी खाई की रजणे;

प्रभुए खे टोल़ने वाल़ेया प्रभुए री स्तुति करनी।

सेओ सदा जिऊँदे रओ!

27 तरतिया रे सबी दूर-दूर देशो रे लोका प्रभुए रा नाओं याद करना

ओर तेसरी तरफा खे फिरने

ओर हर जातिया रे लोका तेरी आराधना करनी।

28 कऊँकि राज्य प्रभुए रा ईए

ओर सबी देशा पाँदे सेई राजा ए।*

29 पक्का, तरतिया रे सारे कमण्डी लोक प्रभुए रे सामणे चुकणे;

सेयो सब जो माट्टिया रे मिली जाओए

ओर जो आपणा प्राण नि बचाई सकदे,

तिना सबी यहोवे रे सामणे ई कुटणे टेकणे।

30 एकी पीढ़िया रे लोका तेसरी सेवा करनी;

दूजी पीढ़िया रे लोका प्रभुए रे बारे बताणा।

31 सेयो आऊणे ओर तेसरी तार्मिकता रे काम एकी वंशो पाँदे जो पैदा ऊणा,

ये बोली की प्रगट करने कि तिने एड़े-एड़े अचम्बे रे काम कित्ते।