पजन 69

मुसीबता रे बखते मतादा रिया तँईं पुकार

बजाणे वाल़े परदानो रिया तँईं शोशन्नीम रागो रे दाऊदो रा गीत

1 ओ परमेशर, माखे बचाई लओ! कऊँकि बाढ़ा रा पाणी मेरे गल़े तक आईगा रा

ओर आऊँ डूबणे लगी रा।

2 आऊँ चिकड़ो बीचे तसणे लगी रा

ओर माखे पैर राखणे खे केथी बी जगा नि ए;

आऊँ डूगे पाणिए बीचे आईगा रा ओर पाणिए री ताअरा रे डूबणे लगी रा।

3 आऊँ आका पाँदे-पाँदे थकी गा, मेरा गल़ा सूकीगा रा;

आपणे परमेशरो खे न्याल़दे-न्याल़दे मेरिया आखी थकी गी रिया।

4 जो बिना बजा ते मेरे बैरी ए,

सेयो गिणतिया रे मेरे सिरो रे बाल़ा ते बी जादा ए।

माखे नाश करने वाल़े जो बेकारो रेई मेरे दुश्मण ए,

मां पाँदे चूठे दोष लगाणे वाल़े तागतबर ए,

जो मैं लूटी नि राखेया, से बी माखे देणा पड़ेया।*69:4 यूह. 15:25, पजन 35:19

5 ओ परमेशर, तूँ तो मेरी मूर्खता खे जाणेया

ओर मेरे कित्ते रे अपराद तां सामणे ए।

6 ओ प्रभु, ओ स्वर्गिय सेनाओं रे प्रभु, जिना री उम्मीद तां पाँदे ए,

सेयो मेरिया बजा ते शर्मिंदा नि ओ,

ओ इस्राएलो रे परमेशर, जो ताखे टोल़ोए,

सेयो मेरिया बजा ते बेज्जत नि ओ।

7 तेरिया ई तँईं मेरी निंदा ऊई री

ओर मेरा मूँ शरमा रे मारे टखी रा।

8 आऊँ आपणे ई इस्राएली पाईया सामणे पाखला माणूं बणीगा

ओर आपणे सके पाईया रिया नजरा रे परदेशी ठईरेया।

9 कऊँकि आऊँ तेरे मईलो रिया तँईं जोशो साथे परेया रा फुखदे-फुखदे पस्म ऊईगा

ओर जो निंदा सेयो तेरी करोए, सेई निंदा माखे सईन करनी पड़ोई।*69:9 यूह. 2:17, रोमी 15:3, इब्रानी 11:26, रोमी. 15:3

10 जेबे मैं रोंदे ऊए बअरत करी की आपणे आपू खे नम्र कित्तेया,

तेबे तिजी ते बी मेरी निंदा ई ऊई।

11 जेबे आँऊ टाटा*69:11 टाटा टाट मतलब शोगो रे टाल्ले रे टाल्ले पईनुँआ,

ये देखणे खे कि आऊँ उदास आ, तो सेयो मेरा मजाक उडाओए।

12 सेयो हर जगा दे मेरे बारे दे गल्ला करोए,

ओर शराबी मेरे बारे दे गीत बणाओए।

13 पर ओ यहोवा, मेरी प्रार्थना तो तेरिया खुशिया रे बखते ई ऊई ए;

ओ परमेशर आपणी बड़ी पारी करूणा ते

ओर बचाणे री आपणी सच्ची कसमा रे मुताबिक मेरी सुणी लओ।

14 माखे चिकड़ो बीचा ते बारे निकयाल़ी दे ताकि आऊँ तिदे तसी नि जाऊँ;

माखे मेरे बैरिया ते ओर डूगे पाणिए रे डूबणे ते बचाई लओ।

15 आऊँ पाणिए री ताअरा रे हड़ी नि जाऊँ

ओर ना ई आऊँ डूगे पाणिए रे डूबी की मरूँ ओर ना ई कब्रा रा मूरा मां पाँदे बंद ओ।

16 ओ प्रभु, माखे उत्तर दे, कऊँकि तेरी करूणा बऊत खरी ए;

आपणी दया रे मुताबिक मेरिया तरफा खे त्यान दे।

17 आपणे दासो ते आपणे आपू खे नि लको,

कऊँकि आऊँ बडिया मुसीबता रे आ, फटाफट माखे ज्वाब दे।

18 मां नेड़े आई की माखे छुड़ाई लओ,

मेरे दुश्मणा ते माखे आजाद करी दे।

19 तूँ मेरी निंदा, शर्म ओर मेरी बेज्जतिया खे

जो आऊँ सईणे लगी रा तिना सबी खे जाणेया,

तूँ मेरे सारे बैरिया खे जाणेया।

20 मेरा दिल निंदा रिया बजा ते दु:खी ए

ओर आऊँ बऊत ई जादा उदास ए।

मैं केसी तरस खाणे वाल़े री उम्मीद तो कित्ती पर कोई नि मिलेया

ओर शान्ति देणे वाल़ेया खे न्याल़दा रया, पर कोई नि मिलेया।

21 तिने लोके माखे खाणे खे जईर दित्तेया

ओर मेरी त्याय मटयाणे खे सिरका पल़्याया।*69:21 मरक 15:23,36, लूक 23:36, यूह. 19:28,29

22 तिना री रोटिया री जगा तिना खे फन्दे री जगा बणी जाओ

ओर जेबे सेयो मां साथे शान्तिया ते रणे लगी रे ओ,

से बखत तिना खे फन्दा बणी जाओ।

23 तिना रिया आखी तुँदल़िया पड़ी जाओ ताकि सेयो देखी नि सको

ओर तूँ तिना रे लको खे सदा ई चुकाई की राख।*69:23 रोमी 11:9,10

24 तूँ तिना पाँदे आपणा गुस्सा पड़का

ओर तेरा पड़केया रा गुस्सा तिना खे स्वा करी देओ।*69:24 प्रकाशित 16:1

25 तिना रे रणे री जगा ऊजड़ी जाओ,

तिना रे कअरो रे कोई नि रओ।*69:25 प्रेरित 1:20

26 एड़े माणूं तेस आदमिए रा पीछा करोए जो तैं मारी राखेया;

सेयो तिना लोका री तकलीफा री चर्चा करोए जो तैं कायल कित्ते।*69:26 यशायाह. 53:4

27 तिना रे सबी पापा खे लिखी लओ।

तिना रे पाप तिना खे कदी बी माफ नि करने, कि सेयो तर्मी ऊई जाओ।

28 जिन्दगिया री कताबा ते तिना रा नाओं मटयाई दे

ओर तिना रे नाओं तर्मिया साथे लिखेया नि जाओ।*69:28 लूक 10:20, प्रकाशित 3:5, प्रकाशित 20:12,15, प्रकाशित 21:27

29 मां साथे बुरा बर्ताओ करने लगी रे ओर दु:ख ऊणे लगी रा।

मेरी रक्षा करो, परमेशर, ओर माखे बचाई की राख!

30 मां गाणा गायी की यहोवे रे नाओं री स्तुति करनी

ओर तन्यवाद करदे ऊए तेरी तारीफ करनी। 31 एड़ा करने ते ओ यहोवा तूँ डांगरा रिया बलिया ते बी जादा खुश ऊणे।

बल्कि सींगा वाल़े ओर खुरो वाल़े बल़दो रिया बलिया ते बी जादा अच्छा लगणा।

32 नम्र लोक इजी खे देखी की खुश ऊणे;

ओ परमेशरो खे टोल़ने वाल़ेयो, तुसा रे दिलो खे नवीं तागत मिलो।

33 कऊँकि प्रभु गरीबा री सुणोआ ओर आपणे लोका ते,

जो बंदुए ए तिना ते कृणा नि करदा।

34 स्वर्ग ओर तरती, समुद्र

ओर तिदे सब रणे वाल़े सारे जीव-जंतु तेरी स्तुति करो।

35 परमेशरो सिय्योनो री रक्षा करनी

ओर यहूदा प्रदेशो रे शईर फेर बसाणे

ओर प्रभुए रे लोक तेती फेर बसी की तेथो रे अक्कदार ऊई जाणे।

36 तेसरे दासा रे वंशो रे लोका से आपणे इस्से रे पाणा

ओर प्रभुए रे नाओं ते प्यार करने वाल़े ई तेती बसे रे रणे।