1 ओ जाणे-माणे रे माणूंओ,* क्या तुसे सच्ची तार्मिकता रिया गल्ला बोलोए?

ओ न्याय करने वाल़े लोको, क्या तुसे सच्चाईया ते न्याय करोए?

2 तुसे कदी न्याय नि करदे, तुसे हमेशा बुरा ई सोचोए,

तुसे देशो दे चगड़े ई करोए।

3 दुष्ट लोक जन्मो तेई गल़त बाटा रे पटकी जाओए,

जेबे सेयो पेटो रेई ओए तदुए तेई चूठ बोलणे री बुराई करदे ऊए पटकी जाओए।

4 तिना रे सापो रे विषो जेड़ा विष ए,

सेयो तेस टऊणे नागो जेड़े ए जो आपणा कान बन्द करी लओआ;

5 ओर सपेरा चाए कितणी ई निपुणता साथे मंत्र पढ़ो,

तेबे बी से तेसरी नि सुणदा।

6 ओ परमेशर, तिना रे मुंए ते दाँद तोड़ी दे;

ओ प्रभु, तिना जवान शेरा री दाड़ा पटी दे!

7 सेयो कुल़ी की बह्यींदे ऊए पाणिए जेड़े ऊई जाओ;

सेयो बाटा रे काओ जेड़े दबी की सूकी जाओ।

8 सेयो फीला जेड़े ऊई जाओ, जो चलदे बखते ई नाश ऊई जाओईया

ओर जवाणसा रे गर्भो री टाल़ा जेड़े ऊई जाओ, जिने त्याड़ा देखेया ई नि।

9 इजी ते पईले कि तुसा री आँडिया रे कांडेया वाल़े लक्कड़ूआ री चल़ लगो,

परमेशरो तूफानो साथे बिना फूखे ओर फूखे रे, दोनो डवाई की लई जाणे।

10 ओर पापी माणूंए खे सजा मिलदे देखी की तर्मी माणूंए खे खुशी मिलणी,

ओर आपणे दुश्मणा रे खूनो ते तिना आपणे पैर तोओ,

11 तेबे माणूंआ बोलणे लगणा, "पक्का तर्मिया खे ईनाम ए;

सच्चो खेई एक परमेशर ए, जो तरतिया पाँदे न्याय करोआ।"