1 ओ प्रभु, मेरे शब्द त्यानो साथे सुण,

मेरे त्यान करने रिया तरफा खे मन लगा।

2 ओ मेरे राजा! मेरे परमेशर! आँऊ तेरी दुहाई देऊँआ तिजी पाँदे त्यान दे,

कऊँकि आऊँ तांते ई प्रार्थना करूँआ।

3 ओ प्रभु, प्यागा ताखे मेरी पुकार सुणनी।

मां तड़के उठी की प्रार्थना करी की तेरे ज्वाबो रा इन्तजार करना।

4 कऊँकि तूँ एड़ा परमेशर नि ए जो दुष्टता रे कामा ते खुश ओआ;

बुरे लोक तां साथे नि रई सकदे।

5 कमण्डी तां सामणे खड़े नि रई सकणे;

ताखे सबी अनर्थ करने वाल़ेया ते नफरत ए।

6 तां सेयो, जो चूठ बोलोए नाश करी देणे;

प्रभु तो अत्यारे ओर कपट करने वाल़ेया माणूंआ ते नफरत करोआ।

7 पर आऊँ तेरी अपार करूणा रिया बजा ते तेरे मईलो रे आऊणा।

मां तेरा डर मानी की तेरे पवित्र मन्दरो रिया तरफा खे माथा टेकणा।

8 ओ यहोवा, माखे सई बाटा दे चलणे दे मताद कर।

मेरे दुश्मण मां पाँदे अमला करने रा इन्तजार करने लगी रे।

माखे सई तरीके री बाट दखा,

ताकि आऊँ गल़त बाटा दे नि जाई सकूँ।

9 जो कुछ सेयो बोलोए से सच्च नि ए!

सेयो सिर्फ नाश करना चाओए।

तिना रे शब्द छिपे दे गड्डे जेड़े तोखा देणे वाल़े ओए,

ओर तिना री जीब चूठ बोलणे रिया तँईं ठीक ओई।*

10 ओ परमेशर, तूँ तिना खे दोषी ठईरा;

सेयो आपणी साजिशा रे आपू ई फसी जाओ;

तिना खे तिना रे जादा पापो रिया बजा ते आपणे सामणे ते दूर करी दे,

कऊँकि तिने तां साथे बगावत करी राखी।

11 पर जितणे तां पाँदे परोसा राखोए, सब आनंद करो,

सेयो सदा जोरे की गांदे रओ; तूँ तिना री रक्षा करेया,

ओर जो तां साथे प्यार करोए, सेयो तांदे खुश ओ।

12 तूँ तर्मी लोका खे आशीर्वाद देआ जो तेरिया आज्ञा खे मानोए,

प्रभु; तेरा प्रेम तिना खे बचाओआ।