1 यहोवे री स्तुति करो! से माणूं बऊत ई तन्य ए जो यहोवे री इज्जत करोआ,

जो तेसरिया आज्ञा रा पाल़न करने ते खुश ओए।

2 तेसरा वंश देशो दे महान ऊणा;

सच्चे माणूंआ री ल्वादा परमेशरो ते आशीष पाणी।

3 तेसरा परिवार तनवान ऊणा,

ओर तेसरा तर्म सदा खे बणेया दा रणा।

4 सच्चे माणूंए रिया तँईं न्हेरे दे जोति उदय ओई,

प्रभु अनुग्रह करने वाल़ा, दयालु ओर तार्मिक ए।

5 जो माणूं ओरी पाँदे दया करोआ ओर त्वार देओआ,

ओर ईमानदारिया साथे आपणे हरेक काम करोआ, तेसरा कल्याण ओआ।

6 से कदी बी डगमगाणा नि;

तार्मिक माणूंए री याद सदा बणी री रणी।

7 से बुरिया खबरा ते नि डरदा;

तेसरा दिल प्रभुए पाँदे परोसा राखणे ते पक्का बणेया रा रओआ।

8 तेसरा दिल मजबूत ए,

जदुए तक से आपणे दुश्मणा पाँदे नजर करी की सन्तुष्ट नि ओ, से नि डरना।

9 तिने उदारता साथे गरीबा खे दान दित्तेया,

तेसरी तार्मिकता सदा बणी री रणी

ओर महिमा साथे तेसरा सींग ऊच्चा कित्तेया जाणा।*

10 दुष्ट इजी खे देखी की गुस्से ऊणा;

से दाँद किरड़दा ऊआ ओर गल़ी-गल़ी की मरी जाणा;

पर दुष्टा री इच्छा पूरी नि ऊणी।*