1 आऊँ प्रभुए ते प्यार करूँआ,

कऊँकि तिने मेरी प्रार्थना सुणी राखी।

2 तिने मेरिया तरफा खे सदा त्यान देई राखेया,

इजी रिया खातर मां पूरी जिन्दगी तेसखे आका पाँदे रणा।

3 मौत मेरे चऊँ कनारे थी;

आऊँ मृत्यु-लोको रे जंजाल़ो रे फसेया रा था;

माखे कष्ट ओर दु:ख चेलणे पड़े।*

4 तेबे मैं बिनती कित्ती, "ओ यहोवा,

माखे मरने ते बचाई लओ!"

5 प्रभु अनुग्रह करने वाल़ा ओर तर्मी ए;

म्हारा परमेशर दया करने वाल़ा ए।

6 प्रभु पोल़ेया माणूंआ री रक्षा करोआ;

जेबे आऊँ बऊत बुरिया दशा रे था, तिने आँऊ बचाई ला।

7 ओ मेरे मन, पक्का बणेया रा रओ;

कऊँकि यहोवे मां पाँदे पलाई करी राखी।

8 यहोवे आऊँ मरने ते बचाई राखेया;

तिने मेरे आसू रोके ओर आऊँ आरने ते बचाया।

9 एबे मां एते दुनिया दे जेती लोक रओए,

यहोवे री सेवा करनी।

10 मैं तेबे बी यहोवे पाँदे परोसा कित्तेया,

जेबे मैं बोलेया, "माखे बऊत दु:ख ए।"*

11 मैं बिना सोचे-समजे ये बोलेया, "सब लोक चूठ बोलोए।"*

12 यहोवे मेरिया तँईं जितणी बी पलाई कित्ती,

तिजी रे बदले आऊँ तेसखे क्या देऊँ?

13 मां ताखे अंगूरा रे रसो री पेंट चढ़ाणी,

ओर तेरे नाओं ते प्रार्थना करनी, कऊँकि तैं आँऊ बचाई राखेया।

14 प्रभुए रे लोका सामणे मां प्रभुए खे सेई देणा

जो मैं वादा करी राखेया।

15 प्रभुए रे पग्ता री मौत,

तेसरिया नजरा रे बऊत ई किमती ए।

16 ओ प्रभु, सुण, आऊँ तेरा दास ए;

आऊँ तेरा दास ए ओर तेरी दासिया रा पाऊ ए। तैं आँऊ मौता ते बचाई राखेया।

17 मां ताखे तन्यवादो री बलि चढ़ाणी

ओर यहोवा, तेरे नाओं ते प्रार्थना करनी।

18,19 मां यहोवे री प्रजा रे सामणे, प्रभुए रे मईलो रे आँगणो दे,

ओ यरूशलेम, तेरे पीतरे मां यहोवे रिया तँईं आपणियां मान्नता पुरिया करनिया।

यहोवे री स्तुति करो!