पजन 60

छुटकारे रिया तँईं प्रार्थना

बजाणे वाल़े परदानो रिया तँईं दाऊदो रा मिक्ताम शोशनेदूत रागो रे, शिक्षा रिया तँईं। जेबे से अरम्नहरैम ओर अरमसोबा ते लड़ो था। ओर योआबे वापस आई की लूणो रिया काअटिया दे बारा ह्जार एदोमी मर्द मारी ते।

1 ओ परमेशर, तैं आसे छाडी ते ओर आसे तोड़ी ते।

तूँ गुस्से ऊआ; एबे आसा खे फेर पईले जेड़ा बणाई दे।

2 तैं तरती ईलाई ती ओर से फाड़ी ती;

एबे तिजी रिया खीड़ा परी दे,

कऊँकि से डगमगाणे लगी री।

3 तैं आपणी प्रजा रे लोका खे बुरे दिन दखाए,

तैं आसा खे लड़खड़ाणे वाल़ा अंगूरा रा रस पल़्याया।

4 जो तेरे डरो दे रओए, तिना खे तूँ चण्डा देआ,

ताकि सेयो नाश ऊणे ते बची जाओ। सेला

5 ओ परमेशर तूँ आसा खे आपणी महान शक्ति ओर तागती ते बचा,

ताकि तेरी प्रजा जिना ते तूँ प्यार राखेया छूटी जाओ।

6 परमेशरे पवित्र जगा ते बोलेया, "मां खुश ऊई की शकेम शईरो रा बटवारा करना

ओर मां सुक्कोतो री काअटी नपवाणी।"

7 गिलाद देश मेरा ए, मनश्शे रा देश बी मेरा ए

ओर एप्रैमो रा देश मेरे सिरो रा टोप ए,

यहूदा देश मेरा राजदण्ड ए।

8 पर मोआबो रा देश मेरे तोणे रा पांडा ए;

ओर एदोमो रे देशो पाँदे मां आपणा जोड़ा सेटणा ओर से मेरे मालक ऊणे रा नशाण ऊणा।

क्या पलिश्ती देशो रे लोक एड़ा सोचोए कि तिना री जयजयकार ऊणी? ओर क्या सेयो मांते जीती सकोए?

9 ओ परमेशर, कुण माखे गढ़वाल़े शईरो दे लई जाओगा?

माखे एदोम देशो तक कुण लई जाओगा?

10 ओ परमेशर, क्या तैं आसे छाडी नि दित्ते रे?

ओ परमेशर, तूँ म्हारी सेना साथे कऊँ नि जांदा!

11 म्हारे दुश्मणा रे खलाफ म्हारी मताद कर,

कऊँकि माणूंआ ते मतादा री उम्मीद राखणा बेकार ए।

12 परमेशरो रिया मतादा रिया बजा ते आसा वीरता साथे लड़ना,

कऊँकि परमेशरो ई म्हारे दुश्मण केसणे।