1 ओ मेरे परमेशर, ओ राजा, मां तेरा गुणगाण करना

ओर जुगो-जुगो तक तेरे नाओं खे तन्य बोलदे रणा।

2 हर रोज मां ताखे तन्य बोलेया करना

ओर जुगो-जुगो तक तेरे नाओं री स्तुति करदे रणा।

3 प्रभु महान् ओर बऊत स्तुति करने जोगा ए

ओर प्रभुए री महानता अपार ए।

4 तेरे कामा री तारीफ ओर तेरे महान कामा रा बखाण,

पीढ़िया ते पीढ़िया तक ऊँदा जाणा।

5 मां तेरे एश्वर्य री महिमा रे प्रतापो पाँदे

ओर तेरे अचम्बे रे कामा पाँदे त्यान करना।

6 लोका तेरे खतरनाक कामा री शक्तिया री चर्चा करनी

ओर मां तेरे बड़े-बड़े कामा रा बखाण करना।

7 तिना तेरिया सारिया पलाईया रे बारे दे बताणा,

ओर तेरे तर्मो रे बारे दे गाणा।

8 प्रभु अनुग्रह करने वाल़ा ओर दयालु,

देरा ते गुस्सा करने वाल़ा ओर बऊत करूणा करने वाल़ा ए।

9 प्रभु सबी रिया तँईं पला ए

ओर तेसरी दया तेसरिया सारिया सृष्टिया पाँदे ए।

10 ओ प्रभु, तेरिया सारिया सृष्टिया तेरा तन्यवाद करना

ओर तेरे पग्त लोका ताखे तन्यवाद बोलेया करना!

11 तिना तेरे राज्य री महिमा री चर्चा करनी

ओर तेरे सामर्था रिया गल्ला करनिया,

12 ताकि सेयो माणूंआ पाँदे तेरे महान कामा

ओर तेरे राज्य रे प्रतापो री महिमा प्रगट करो।

13 तेरा राज्य जुगो-जुगो रा

ओर तेरा राज पीढ़िया ते पीढ़िया तक बणेया रा रणा।

14 यहोवा तिना री मताद करोआ जो मुसीबता दे ए;

से रूड़ेया देया खे ऊबे चकोआ।

15 प्रभु, सारेया प्राणिया रिया आखी तेरिया तरफा खे लगी रिया रओईया

ओर तूँ तिना खे सई बखतो पाँदे खाणे खे देया।

16 तूँ आपणी मुट्ठी खोली की,

सबी प्राणिया खे खाणे खे देई की सन्तुष्ट करेआ।

17 प्रभु आपणे सारे चाल-चलणो रे तार्मिक

ओर आपणे सबी कामा दे करूणामय ए।*

18 प्रभु आपणे सबी आका पाणे वाल़ेया रे नेड़े ए,

से तिना सबी रे नेड़े ए, जितणे तेसखे सच्चाईया साथे आका पाओए।

19 से आपणे सारेया पग्ता री इच्छा पूरी करोआ

ओर तिना री दुहाई सुणी की तिना खे बचाई लओआ।

20 प्रभु तिना सबी री रक्षा करोआ जो तेसते प्यार करोए,

पर से सबी दुष्टा रा सत्यानाश करोआ।

21 मां प्रभुए री स्तुति करनी

ओर सारे प्राणी प्रभुए रे पवित्र नाओं खे जुगो-जुगो तक तन्य बोलदे रओ।