मुसीबता रे पड़े रे नौजवानो री प्रार्थना
एक दु:खी माणूंए री तेस बखतो री प्रार्थना जेबे से दु:खो रे मारे आपणे शोगो रिया गल्ला प्रभुए रे सामणे खुली की बोलोआ।
1 ओ प्रभु, मेरी प्रार्थना सुण;
मेरा मतादा रिया तँईं रोणा तां तक पऊँचो!
2 मेरी मुसीबता रे बखते मांते नि लूकणा;
मेरिया प्रार्थना रिया तरफा खे त्यान दे,
ओर चट ज्वाब दे।
3 कऊँकि मेरिया जिन्दगिया रे दिन तुएँ जेड़े लोप ऊणे लगी रे
ओर मेरी आड्डिया लकड़ूआ जेड़िया फूकी गी रिया।
4 आऊँ काओ जेड़ा मुरझाई गा रा ए,
ओर आऊँ आपणी रोटी खाणा पूली जाऊँआ।
5 कंणदे-कंणदे आऊँ एड़ा सूकीगा कि मेरे शरीरो दे मेरी आड्डिया दिशणे लगी रिया ए।
6 आऊँ सुनसाण जगा रे धनेश पंछिए जेड़ा ऊईगा रा,
आऊँ खण्डहरा रे उल्लूए जेड़ा बणीगा रा।
7 आऊँ जागदा रऊँआ ओर चिड़िया जेड़ा ऊईगा रा
जो छतो पाँदे कल्ली बैठी री रओई।
8 मेरे दुश्मण लगातार मेरी निंदा करोए;
जो मेरे बरोदो रिया धुना रे इस्साल ऊणे लगी रे,
सेयो मेरा नाओं लई की स्राप देओए।
9 मैं रोटिया रे बदले स्वा खाई
ओर आसू मिलाई की पाणी पियूँआ।
10 ये तेरे गुस्से ओर तेरे कोपो रिया बजा ते ऊईरा;
कऊँकि तैं आऊँ सम्बाल़ेया ओर फेर सेटी ता रा।
11 मेरी उम्र कटदी छांयी जेड़ी ए
ओर आऊँ आपू काओ जेड़ा सूकदा चली रा।
12 पर ओ प्रभु, तूँ सदा ई राजगद्दिया पाँदे विराजमान रणा;
ओर तेरा नाओं पीढ़िया ते पीढ़िया तक बणेया रा रणा।
13 तां उठी की सिय्योनो पाँदे दया करनी;
कऊँकि तेस पाँदे दया करने रा ठराया रा बखत आईगा रा।
14 तेरे दास तेस शईरो साथे प्यार करोए, चाए से नाश ई ऊईगा रा;
तिना खे तिजी पाँदे दया आओई, चाए से खण्डहर ईए।
15 इजी बजा ते जातिया-जातिया रे लोका प्रभुए रे नाओं रा डर मानणा
ओर तरतिया रे सारे राजा तेरे प्रतापो ते डरने।
16 कऊँकि प्रभुए सिय्योन फेर बसाई राखेया
ओर से आपणी महिमा रे दिशोआ;
17 तेस आपणे छाडे रे लोका पाँदे त्यान करना
ओर तिना री प्रार्थना सुणनी।
18 ये गल्ल आऊणे वाल़िया पीढ़िया खे लिखी जाणी,
ताकि एक जाति जो पैदा ऊणी, से यहोवे री स्तुति करो।
19 कऊँकि प्रभुए आपणी ऊच्ची ओर पवित्र जगा ते नजर करी की
स्वर्गो ते तरतिया खे देखेया,
20 ताकि से बन्दिया रा कणना सुणो
ओर मौता री सजा पाए रेया खे आजाद करो;
21 तेबे लोका सिय्योनो रे प्रभुए रे नाओं रा बखाण करना
ओर यरूशलेमो रे तेसरी स्तुति करनी;
22 ये तेस बखते ऊणा जेबे देश-देश
ओर राज्य-राज्य रे लोक प्रभुए री आराधना करने खे कट्ठे ऊणे।
23 तैं यहोवे आऊँ जवानिया देई कमजोर करिता दा ए,
ओर तैं मेरी तागत ओर मेरी उम्रा रे दिन बी कम करीते।
24 मैं बोलेया, "ओ मेरे परमेशर!
तेरी उम्र पीढ़िया ते पीढ़िया तक बणी री रणी,
तूँ माखे आदिया उम्रा रे नि चकेया।"
25 शुरूओ तेई तैं तरतिया री निऊँ पाई
ओर सर्ग तेरे आथो रा बणाया राए।
26 तरती ओर सर्ग सब नाश ऊई जाणे, पर तूँ सदा बणेया रा रणा;
ओर सेयो सब टाल्लेया जेड़े पुराणे ऊई जाणे।
तां सेयो टाल्लेया जेड़े बदल़ने, इजी खे सेयो बदली जाणे;
27 पर तूँ तेथी ए ओर तेरे साला रा अन्त नि ऊणा।
28 तेरे दासा री ल्वाद सई-सलामत बणी री रणी
ओर तिना रा वंश तां सामणे बणेया रा रणा।