पजन 73

परमेशरो रा न्याय

आसापो रा पजन

1 परमेशर सच्चो खे ई इस्राएलो रे लोका रिया तँईं पला ए, तिना लोका रिया तँईं जो ईमानदारिया ते तेसरी सेवा करना चाओए।

2 पर मेरा परोसा लगभग खत्म ई ऊईगा था, मैं परोसा बी लगभग खोई दित्तेया था,

मेरे पैर खड़ीसणे ई वाल़े थे।

3 जेबे आऊँ दुष्ट लोका रा कल्याण देखूँ था,

तेबे आऊँ तिना कमण्डी लोका रे बारे दे ईर्ष्या करुँ था।

4 कऊँकि तिना लोका खे कोई बी पीड़ नि ऊँदी।

सेयो हमेशा मजबूत ओर ठीक रओए।

5 तिना खे ओरी माणूंआ जेड़ा कष्ट नि ऊँदा

ओर ओरी माणूंआ जेड़ी तिना पाँदे बिपदा नि पड़दी।

6 ओर इजी बजा ते तिने कमण्ड आरो जेड़ा

ओर ईंसा खे चोगे रे जेड़ा पईनोए;

7 तिना रिया लाल़ची आखी तिना खे पापो रिया तरफा खे लई जाओईया।

तिना रा मन बुरेया कामा रे बारे दे सोचोआ।

8 सेयो तार्मिक माणूंए रा मजाक ऊड़ाओए

ओर तिना साथे दुष्टता रिया गल्ला बोलोए।

सेयो बडिया-बडिया गल्ला मारोए।

9 सेयो इतणे कमण्डी ए कि सेयो स्वर्गो रे बैठे रे परमेशरो खे बुरा बोलोए

ओर दूजेया खे सेयो उक्कम देओए!

10 इजी रिया तँईं परमेशरो रे लोक बुरे माणूंआ गे आई की तिना री तारीफ करोए

ओर तिना दे केसी बी गल्ला री कमी नि पाँदे।

11 तेबे दुष्ट लोक बोलोए, "परमेशर किंयाँ जाणोआ?

क्या परमपरदानो खे कुछ ज्ञान ए?"

12 देखो, यो तो दुष्ट लोक ए;

तेबे बी सानिया ते पैसा कट्ठा करोए।

13 मैं बेकारो रेई आपणा दिल शुद्ध कित्तेया

ओर आपणे आथ बिना दोषो रे तोई राखे;

14 कऊँकि आऊँ पूरा दिन मार खांदा आई रा

ओर रोज प्यागा मेरी ताड़ना ऊँदी आई री।

15 जे आऊँ बी एड़िया दुष्ट गल्ला करदा,

से मेरा तेरिया प्रजा साथे तोखा देणा ऊँदा।

16 जेबे आऊँ सोचणे लगेया कि ये आऊँ किंयाँ समजूँ,

तो ये मेरी नजरा रे बऊत जादा कठण काम था,

17 पर जेबे आँऊ परमेशरो रे मन्दरो दे गया,

तेबे मैं दुष्ट माणूंआ रा अन्त समजी ला।

18 पक्का तूँ तिना खे खड़ीसणे वाल़ी जगा रे राखेया

ओर रूड़ाई की सत्यानाश करी देआ।

19 सेयो थोड़ी जिया देरा रे किंयाँ ऊजड़ी गे!

सेयो डरदे-डरदे पूरिया तरअ ते नाश ऊईगे।

20 ओ परमेशर, सेयो माणूं एड़े ऊणे जेड़े कोई सुफना, जेते खे आसे जागदे ई पूली जाऊँए।

तिंयाँ ई तां जेबे उठणा, तेबे सेयो राची जाणे।

21 मेरा मन तो कड़ुआ ऊईगा,

मेरे दिलो रे बऊत ई तकलीफ थी।

22 आऊँ तो मूर्ख ओर नासमज था,

आऊँ तां सामणे रई की बी डांगरो जेड़ा बणीगा था।

23 तेबे बी आऊँ लगातार तां ई साथे था;

तैं मेरा दाँणा आथ पकड़ी की राखेया।

24 तूँ आपणी सलाई ते माखे सई बाट दखाएया

ओर जिन्दगिया रे आखरी रे तां आँऊ आपणी महिमा रे ग्रईण करना।

25 स्वर्गो रे मेरा ओर कोई नि ए;

तां साथे तरतिया पाँदे रंदे ऊए आऊँ ओर कुछ नि चांदा।

26 मेरा शरीर ओर दिल चाए दोनो आरी जाओ;

पर परमेशर, तूँ सदा मेरे दिलो री चट्टान ओर इस्सा ए।

27 जो तांते दूर रओए, सेयो तो नाश ऊणे;

जो कोई तेरे खलाफ व्याभिचारो जेड़ा तोखा करोआ, तेसरा तूँ नाश करी देया।

28 पर परमेशरो रे नेड़े रणा, येई माखे पला ए;

मैं प्रभु परमेशर आपणी शरण लणे री जगा मानी राखी;

प्रभु, मां तेरे सारे कामा रा बखाण करना।