1 आऊँ ईम्मती साथे परमेशरो रा इन्तजार करूँआ कि से माखे बचाओ;

आऊँ सिर्फ तेस ई पाँदे पुरिया तरआ ते परोसा करूँआ।

2 मेरी रक्षा करने वाल़ा ओर माखे बचाणे वाल़ा सेईए;

से मेरे शरण लणे रा ऊच्चा गढ़ ए ओर कोई बी माखे अराई नि सकदा।

3 तुसा कदुए तक केसी एड़े माणूंए पाँदे अमला करना

जो एक टुटी-फुटी दी दवाला ते जादा मजबूत नि ए?

4 सेयो माखे मेरे आदरो रिया जगा ते बारे निकाल़ना चाओए,

सेयो चूठ बोलणे ते प्यार राखोए,

मुंए ते तो सेयो आशीर्वाद देणे रिया गल्ला करोए, पर दिलो ते स्राप देओए। सेला

5 आऊँ परमेशरो रे आसरे रऊँआ,

ओर आऊँ तेस पाँदे परोसा राखूँआ।

6 सेई मेरी रक्षा करोआ ओर बचाओआ;

से मेरा रक्षक ए, ओर आऊँ कदी बी आरना नि।

7 मेरा उद्धार ओर मेरी महिमा रा आधार परमेशर ए;

सेई मेरी मजबूत चट्टान ओर मेरी शरण लणे री जगा ए।

8 ओ लोको, हर बखत परमेशरो पाँदे परोसा राखो!

तेसते आपणे मनो रिया गल्ला खुली की बोलो,

कऊँकि परमेशर म्हारी शरण लणे री जगा ए। सेला

9 आसे माणूं तो बस एक साओ जेड़े ए; आसा बीचा ते कोई बी महान नि ए।

आसा सबी रा बजन एक अवा रे चोंके ते बी कम ए।

10 अन्देर करने पाँदे परोसा नि राखो

ओर लूट-मार करी की मिली री चीजा पाँदे बेकारो रे नि फूलो,

चाए तअन-दौलत बढ़ी जाओ, तेबे बी तिजी पाँदे मन नि लगाणा।*

11 मैं परमेशरो खे एकी ते जादा बार ये बोलदे ऊए सुणी राखेया कि सिर्फ सेईए जेसगे सई दे शक्ति ए।

12 ओर ओ प्रभु, करूणा बी तेरी ईए।

कऊँकि तूँ एकी-एकी माणूंए खे तेसरे कामो रे मुताबिक प्रतिफल देया।*