1 आओ आसे प्रभुए रिया तँईं ऊच्चिया आवाजा रे गाईए;

जो परमेशर म्हारी रक्षा करोआ तेसरी जयजयकार करो!

2 आसे तेसरा तन्यवाद करदे ऊए तेस सामणे आईए

ओर पजन गांदे ऊए तेसरी जयजयकार करिए।

3 प्रभु महान परमेशर ए

ओर से सबी देवतेया बीचे महान् राजा ए।

4 तरतिया रिया सारिया डूगिया जगा यहोवे रे ई आथो रे ए

ओर पाह्ड़ो रिया चूँडिया बी तेसरिया ईए।

5 समुद्र तेसरा ईए ओर तिने ई से बणाया

ओर सुकी जगा बी तेसरे ई आथो री रचना ए।

6 आओ आसे प्रभुए रे चरणा रे चूकी की तेसरी आराधना करिए;

आपणे बनाणे वाल़े प्रभुए रे सामणे सिर चूकाईए!

7 कऊँकि यहोवा म्हारा परमेशर ए,

ओर आसे तेसरी प्रजा ए, ओर तेसरे आथो रिया पेडा ए।

आज परमेशरो री आवाज सुणो!*

8 तुसे आपणा दिल इतणा काठा नि करो,

जेड़ा तुसा रे बुजुर्गे तेस दिने कित्तेया था

जेबे सेयो मरीबा रे, सुनसाण जगा दे मस्सा दे थे।*

9 जेती तुसा रे बुजुर्गे मां प्रभुए री परीक्षा कित्ती थी,

तिने मां प्रभुए रे काम देखी की बी से परखेया था।

10 चाल़िया साला तक आऊँ तेसा पीढ़िया रे लोका ते रूठेया रा रया

ओर मैं बोलेया, यो तो परमाणे वाल़े मनो रे ए ओर इने मेरी बाट नि पछयाणी।

11 इजी बजा ते मैं गुस्से रे आई की कसम खाई

कि यो कदी बी मेरे राम करने रिया जगा रे नि जाई सकणे।*