1 ऊच्चिया आवाजा रे खुशिया साथे परमेशरो रा गीत गाओ,

सेई म्हारी तागत ए; याकूबो रे परमेशरो री जयजयकार करो!*

2 पजन गाओ, डफली ओर सारंगिया साथे

मिठिया आवाजा रे बीणा बजाओ।

3 नये चाँदो रे दिने,

ओर पूनेया खे म्हारे त्योआरो रे दिने रड़सिंगा बजाओ।

4 कऊँकि ये इस्राएलो खे बिधि,

ओर याकूबो रे परमेशरो रा ठराया रा नियम ए।

5 जेबे परमेशरे मिस्र देशो खे सजा दित्ती थी, तेबे तिने ये नियम इस्राएलिया खे दित्ते।

माखे एक अणजाण आवाज ये बोलदे ऊए सुणी कि,

6 मैं प्रभुए तिना रिया कांदा पाँदा ते बोज उतारी ता;

तिना रा टोकरी टोणा छूटीगा।

7 तैं मुसीबता रे बखते आँऊ पुकारेया, तेबे मैं तूँ बचाया;

मैं बादल़ गरजणे रिया गुप्त जगा ते ताखे उत्तर दित्तेया,

ओर मरीबा नाओं री सूबल़ा रे नेड़े तेरी परीक्षा कित्ती।* सेला

8 ओ मेरी प्रजा, सुण, आऊँ ताखे सचेत करूँआ!

ओ इस्राएल पला ओ कि तूँ मेरी गल्ल सुणो!

9 तां बीचे केसी पराए देवते री आराधना नि ओ;

ओर ना ई तैं केसी पराये देवते गे माथा टेकणा!

10 तेरा प्रभु परमेशर आऊँ ए,

जो ताखे मिस्र देशो ते निकयाल़ी की लई आई रा।

तूँ आपणा मूँ खोल, मां से परी देणा।*

11 पर मेरिये प्रजे मेरी बाणी नि सुणी;

इस्राएले मेरी आज्ञा नि मानी।

12 इजी री खातर मैं से तेसरे टीठ मनो पाँदे छाडीता,

ताकि से आपणी ई योजना रे मुताबिक चलो।*

13 जे मेरी प्रजे मेरी गल्ल सुणी ऊँदी,

जे इस्राएल मेरी बताई री बाटा रे चलदा,

14 तो आऊँ तिना रे दुश्मणा खे चट ई अराई देंदा

ओर तिना खे सख्त सजा देंदा।

15 जो लोक यहोवे ते नफरत करोए; सेयो डरदे ऊए तेसरे सामणे चुकणे,

तिना री सजा हमेशा खे बणी दी रणी।

16 ओ इस्राएल, आँऊ ताखे खरिया ते खरी कणका रिया रोटिया खुल़ांदा,

ओर आँऊ चट्टानी रे सईतो साथे ताखे रजांदा।