1 जेबे इस्राएली लोक मिस्रो ते निकल़े,

जेबे याकूबो रे कराने रे लोक दूजिया पाषा बोलणे वाल़ेया लोका रे देशो खे छाडीता,

2 तेबे यहूदा यहोवे री पवित्र प्रजा,

ओर इस्राएल तेसरा निज इस्सा बणीगा।

3 जिंयाँ लाल समुद्रे इस्राएली आऊँदे ऊए देखे; से चट दूई इस्सेया दे ऊईगा,

यरदन नदी उल्टी बह्यीणे लगी।*

4 पाह्ड़ खाडूआ जेड़े उटकणे लगे

ओर पाह्ड़िया पेडा-बाकरिया रे बच्चेया जेड़िया उटकणे लगिया।

5 ओ समुद्र, ताखे क्या ऊआ कि तूँ नठीगा?

ओर ओ यरदन नदी, तूँ कऊँ उल्टी बह्यीणे लगी?

6 ओ पाह्ड़ो, तुसे पेडा जेड़े

ओर ओ पाह्ड़ियो तुसे पेडा-बाकरिया रे बच्चेया जेड़िया कऊँ उटकणे लगिया?

7 ओ तरतिए यहोवे रे आऊणे ते,

याकूबो रे परमेशरो री मौजुदगिया रे थरथरा।*

8 प्रभु चट्टानी खे पाणिए रा खाल़,

पथरीली जमीना खे बह्ईंदे पाणिए रे चश्मेया दे बदली देओआ।