पजन 59

सुरक्षा रिया तँईं प्रार्थना

बजाणे वाल़े परदानो रिया तँईं अल-तशहेत रागो रे दाऊदो रा मिक्ताम; जेबे शाऊले दूत पेजे कि सेयो दाऊदो खे काणे रिया तँईं तेसरे कअरो रा पईरा देओ।

1 ओ परमेशर, माखे मेरे दुश्मणा ते बचाई लओ!

जो मां पाँदे अमला करना चाओए, तिना ते मेरी रक्षा कर!

2 इना बुरेया लोका ते तूँ माखे बचा;

ओर इना अत्या करने वाल़ेया ते मेरी रक्षा कर।

3 देख, किंयाँ सेयो माखे काणे रिया तँईं मेरिया ताका रे लगी रे;

जबकि ओ प्रभु, मेरा कोई पाप नि ए,

मैं तिना रे खलाफ कोई पाप नि करी राखेया,

तेबे बी तागतबर माणूं मेरे खलाफ कट्ठे ओए।

4 मैं कोई अपराध नि करी राखेया,

तेबे बी सेयो मां पाँदे अमला करने रिया तँईं त्यार ए।

मेरी मताद करने रिया तँईं जाग

ओर मेरिया एसा दशा खे देखी लओ!

5 ओ स्वर्गिय सेनाओं रे प्रभु परमेशर,

ओ इस्राएलो रे परमेशर, सबी देशा रे लोका खे जो बुरे ओर अत्याचारी ए,

तिना पाँदे दया नि कर, तिना खे सजा देणे रिया तँईं जाग! सेला

6 मेरे दुश्मण साँजा खे वापस आई की कुत्तेया जेड़े गुर्राओए

ओर सेयो शईरो रे चऊँ कनारे कूमोए।

7 ओ यहोवा तिना रा चींगणा ओर तिना री तमकीया खे तो सुण,

तिना री जीब तलवारी जेड़ी पैनी ए, सेयो ये सोचोए कि आसा खे कोई नि सुणदा!

कऊँकि सेयो बोलोए, "कुण म्हारिया गल्ला सुणोआ?"

8 पर ओ प्रभु, तां तिना पाँदे आसणा;

तां सारे देशो री जातिया मजाको रे उडाई देणियां।

9 तूँई मेरी तागत ए, माखे तेरी ई उम्मीद ए!

कऊँकि ओ परमेशर, तूँई मेरा मजबूत गढ़ ए।

10 तूँ मांते प्यार करेआ, ओर तूँ मां नेड़े आऊणा,

ओर तां माखे मेरे दुश्मण आरदे ऊए दखाणे।

11 तिना खे घात नि कर, ओ यहोवा, ओ म्हारी ढाल!

एड़ा नि ओ कि मेरे लोक एसा गल्ला खे पूली जाओ;

तिना खे आपणियां शक्तिया साथे तित्तर बित्तर कर की तिना खे दबाई दे।

12 सेयो आपणे मुंए ते कित्ते रे पाप,

तिना रे ओठा ते निकल़े रे वचन,

तिना रे मुंए ते निकल़ी री स्रापो रिया गल्ला

ओर चूठ बोलणे रिया बजा ते, आपणे ई कमण्डो रे फसी जाओ।

13 तूँ गुस्से रे आई की तिना रा अंत कर,

तिना रा अंत करी दे ताकि सेयो नाश ऊई जाओ,

तेबे लोका जाणना कि परमेशर इस्राएलो पाँदे,

बल्कि तरतिया रे कनारे तक राज करोआ। सेला

14 सेयो लोक साँजा खे वापस आई की कुत्तेया जेड़े गुर्राओए

ओर शईरो रे चऊँ कनारे कूमोए।

15 सेयो पेट परने रिया तँईं रोटिया रे टुकड़ेया खे पटकदे फिरोए

ओर जे रज्जो नि तो पूरी रात गुर्रांदे रओए।

16 पर मां तेरिया तागती रे बारे गीत गाणा

ओर प्यागा तड़के ई तेरी करूणा री मां जयजयकार करनी।

कऊँकि तूँ मेरा ऊच्चा गढ़ ए

ओर मुसीबता रे बखते तूँ मेरी शरण लणे री जगा ठईरी रा।

17 तूँई मेरी तागत ए, मां तेरी तारीफ करदे ऊए तेरा पजन गाणा,

ओर मेरा परमेशर जेस पाँदे आऊँ परोसा करूँआ,

तूँ मेरा मजबूत गढ़

ओर मां पाँदे करूणा करने वाल़ा परमेशर ए।