1 आऊँ मतादा रिया तँईं प्रभुए री दुहाई देऊँआ,

आऊँ ऊच्चिया आवाजा रे प्रभुए ते बिनती करूँआ,

2 आऊँ प्रभुए रे सामणे आपणे दु:खो रिया गल्ला बताऊँआ,

आऊँ आपणियां मुसीबता तेस सामणे बताऊँआ।

3 जेबे आऊँ बऊत जादा नराश ऊई जाऊँआ, तो से जाणोआ कि माखे क्या करना चाईयो।

जेते बाटा रिये आऊँ चलूँआ, तेते बाटा दे मेरे दुश्मणे माखे पकड़ने खे जाल़ बछाई राखेया।

4 जेबे आऊँ आपणे ओरे-पोरे देखूँआ, तो मेरी मताद करने वाल़ा ओर रक्षा करने वाल़ा कोई नि ए।

केसी खे मेरी परवा नि ए।

5 ओ यहोवा, आँऊ तांगे रोया कि तूँ मेरी मताद करे,

माखे बचाणे वाल़ा तूँई ए,

मेरे जिऊँदे जिऊए तूँई मेरा सब कुछ ए।

6 मेरा रोणा त्यानो साथे सुण,

कऊँकि मेरी दशा बऊत बुरी ऊई गी री!

जो मां पीछे पड़ी रे, तिना ते माखे बचाई लओ;

कऊँकि सेयो मांते जादा तागतबर ए।

7 माखे मेरेया दु:खा ते बचा;

तेबे मां तेरिया तर्मी प्रजा रिया मण्डल़िया दे तेरी स्तुति करनी,

कऊँकि तैं मेरी पलाई करी राखी ए।