1 ओ प्रभु परमेशर, मां आपणे पूरे मनो ते तेरा तन्यवाद करना;

मां तेरे सारे अचम्बे रे कामो रा बखाण करना।

2 मां तेरी बजा ते खुश ऊणा,

ओ परमपरदान परमेशर, मां तेरे नाओं रा पजन गाणा।

3 जेबे मेरे दुश्मणा खे एहसास ऊणा कि तूँ बऊत तागतबर ए,

सेयो ठोकर खाओए,

ओर सेयो फेर मरी जाओए।

4 तैं मेरे मकद्दमे रा न्याय करी की फैंसला मेरे अक्को रे दित्तेया;

तैं सिंहासनो पाँदे बैठी की सच्चाईया साथे न्याय कित्तेया।

5 तैं दूजिया जातिया रे* लोक थिड़के ओर दुष्ट नाश कित्ते;

तैं तिना रा नाओं सदा खेई मिटाईता रा।

6 तैं दुश्मणा रे शईर जड़ी तेई पटी ते

ओर जो सारे शईर तैं टाल़ी ते,

तिना रा नाओं-नशाण ई मिटी गा रा।

7 पर प्रभु जुगो-जुगो तक सिंहासनो पाँदे विराजमान ए,

तिने आपणा सिंहासन न्याय री खातर ठराई राखेया।

8 ओर तेस आपू ई दुनिया रा न्याय तार्मिकता साथे करना,

तेस लोका रा मुकद्दमा न्याय साथे नपटेणा।*

9 यहोवा तिना लोका रिया तँईं शरण लणे री जगा ऊणा जो दीन ए;

आ, जेबे तिना खे परेशानी ऊणी तो से तिना खे लूकणे री जगा जेड़ा ऊणा।

10 प्रभु, जो ताखे जाणोए; सेयो तां पाँदे परोसा करी सकोए;

जो तांगे आओए, तिना खे तूँ कदी नि छाडदा।

11 सिय्योन पाह्ड़ो ते राज करने वाल़े प्रभुए रा पजन गाओ!

जातिया-जातिया रे लोका बीचे तेसरे महान कामो रा प्रचार करो!

12 प्रभु अत्या करने वाल़े खे सजा देणा नि पुलदा,

जो गरीब तांगे दुहाई देओए,

तिना री तूँ सुणेया।

13 ओ प्रभु परमेशर! मां पाँदे दया कर।

देख, मेरे बैरी मां पाँदे अत्याचार करने लगी रे,

तूँ ई माखे मरने ते बचाई सकेया।

14 ताकि आऊँ यरूशलेमो रे लोका गे जाई कि तिना सबी गल्ला रा वर्णन करुँ जेतेरिया तँईं आऊँ तेरी स्तुति करूँआ।

आऊँ तेती खुश रणा कऊँकि तैं आऊँ बचाई राखेया।

15 दूजी जातिया वाल़ेया जो गड्डा खणेया था, तिदे सेयो आपू ई पड़ी गे,

जो जाल़ तिने लगाया था, तिदे तिना रा ई पैर फसी गा।

16 परमेशर यहोवा सई न्याय करी की आपणे आपू खे प्रकट कित्तेया,

दुष्ट लोक आपणे ई कित्ते रे कामो रे जाल़ो रे फसी गे। हिग्गायोन, सेला

17 मौत तिना सबी दुष्ट लोका रा भाग्य ए,

जो परमेशरो खे ठुकराई देओए।

18 पर गरीब लोक अनन्तकालो तक बिसरे नि रणे

ओर ना ई नम्र लोका री उम्मीद सदा खे नाश ऊणी।

19 ओ यहोवा, उठ! ओर देशो रे दुष्ट माणूंआ रा न्याय कर;

तिना खे ए सोचणे री आज्ञा नि दे कि सेयो मजबूत ए,

तिना खे कदी बी सजा नि मिलणी।

20 ओ परमेशर, तिना खे डरा!

ताकि सेयो सब लोक जाणी लओ कि सेयो सिर्फ नाश ऊणे वाल़े माणूं ए।