पजन 41

रोगी माणूंए री प्रार्थना

बजाणे वाल़े परदानो रिया तँईं दाऊदो रा पजन

1 से मर्द बऊत ई तन्य ए जो गरीब लोका री सम्बाल़ लओआ! बिपदा रे बखते यहोवे से बचाणा।

2 प्रभुए तेसरी रक्षा करी की से जिऊँदा राखणा ओर से तरतिया पाँदे भाग्यशाली ऊणा। प्रभुए सेयो तिना रे दुश्मणा ते बचाणे।

3 जेबे से बमारिया रिया बजा ते माँजे पाँदे पड़ेया रा ऊणा, तेबे प्रभुए से सम्बाल़ना; तां से बमारिया ते पुरिया तरअ ते ठीक करना।

4 मैं बिनती कित्ती, "ओ प्रभु! मां पाँदे दया कर; माखे तन्दरूस्त कर, कऊँकि मैं तो तेरे खलाफ पाप करी राखेया।"

5 मेरे दुश्मण मेरे बारे दे दुष्टता साथे ये बोलोए: "से कदी मरना ओर तेसरा नाओं कदी मिटणा?"

6 जो लोक माखे मिलणे आओए, सेयो ईमानदार नि ए, सेयो मेरे बारे दे बुरिया खबरा कट्ठिया करोए ओर फेर बारे जाई की लोका बीचे तिना री चर्चा करोए।

7 मेरे सारे बैरी मिली की मेरे खलाफ चूगलिया करोए; सेयो मेरे खलाफ ऊई की मेरे नुकशाणो रे बारे सोचोए।

8 सेयो दुष्ट लोक बोलोए कि एसखे तो कोई बुरी बमारी लगी गी री, एबे जो ये लेटीगा रा, फेर कदी बी ये उठी नि सकदा।

9 मेरा प्यारा दोस्त जेस पाँदे आऊँ परोसा राखूँ था, जो मेरी रोटी खाओ था, तिने बी मेरे खलाफ बोलेया।*41:9 2 शमूएल 15:12, यूह. 13:18, प्रेरित 1:16

10 पर ओ यहोवा, तूँ मां पाँदे दया करी की माखे ठीक करी दे, ताकि आऊँ तिना ते बदला लई सकूँ।

11 मेरा दुश्मण जो मांते जीती नि सकदा, इजी ते मैं जाणी ला कि तूँ मांते खुश ए।

12 तां मेरी मताद करनी, कऊँकि आऊँ सेई करूँआ जो सई ए: तां आऊँ सदा खे आपू सामणे राखणा।

13 इस्राएलो रा प्रभु परमेशर शुरूए ते लई की जुगो-जुगो तक तन्य ए, आमीन्, फेर आमीन्।*41:13 लूक 1:68, पजन 106:48