पजन 85

परमेशरो री दया रिया तँईं प्रार्थना

बजाणे वाल़े परदानो रिया तँईं : कोरह वंशिया रा पजन।

1 ओ यहोवा, तैं आपणे देशो पाँदे दया करी राखी ए,

याकूबो री ल्वादा खे बंदुआईया ते छुड़ाई की लई आई रा।

2 तैं आपणी प्रजा रे बुरे काम माफ करी राखे;

ओर तिना रे सारे पाप टखी ते रे। सेला

3 तैं आपणा गुस्सा शांत करिता रा;

ओर आपणा पड़केया रा कोप दूर करी राखेया।

4 पर ओ परमेशर, एबे आसा रिया तरफा खे कूम, ओर आसा खे फेर तागतबर बणा।

तूँ ई ए जो आसा खे बचाएआ, आसा ते नराज ऊणा बन्द करी दे।

5 क्या तां सदा ई आसा ते नराज रणा?

क्या तां पीढ़िया ते पीढ़िया तक गुस्सा करदे रणा?

6 कृपा करी कि आसा गे वापस आईजा ओर आसा खे नवां जीवन दे!

तेबे आसे जो तेरी प्रजा ए सुखी ऊणे ओर तेरी स्तुति करनी।

7 ओ प्रभु, आपणी करूणा आसा खे दखा,

ओर तूँ म्हारा उद्धार कर।

8 एबे मां त्यानो साथे सुणना कि परमेशर यहोवा क्या बोलोआ?

तेस आपणी प्रजा खे जो पग्त बी ए शान्ति देणी,

पर सेयो दुबारा मूर्खता नि करने लगो।

9 पक्का यहोवे रा उद्धार तिना लोका रे नेड़े ए जो तेसते डरोए,

तेबे म्हारे देशो रे परमेशरो री महिमा दिशणी।

10 करूणा ओर सच्चाई आपू बीचे मिलीगी रिया;

तार्मिकता ओर शान्ति आपू बीचे मिलीगिया।

11 तरतिया बीचा ते सच्चाई डाल़ा जेड़ी उगोई

न्याय सर्गो ते थाले देखणा।

12 फेर प्रभुए खरिया चीजा देणियां

ओर म्हारिया जमीना आपणी उपज देणी।

13 न्याय यहोवे ते आगे-आगे चलणा,

ओर आपणे पैरा रे नशाणो ते आसा खे बाट बनाणी।