1 ओ प्रभु, माखे बुरेया माणूंआ ते बचाई लओ;

ईंसा करने वाल़े मर्दो ते मेरी रक्षा कर;

2 सेयो दिलो रे बुरा करने री सोची राखोए;

सेयो लगातार लड़ाईया करोए।

3 तिना रिया जीबा काणे वाल़े सापो जेड़िया ए,

तिना रिया गल्ला नागो रे जईरो जेड़िया ओईया।* सेला

4 ओ यहोवा, माखे दुष्ट माणूंआ रे आथो ते बचाई लओ;

माखे तिना चगड़ा करने वाल़े लोका ते बचा जो मेरे राचणे री साजिश करोए।

5 इने कमण्डिये माखे फंदे लगाई राखे,

बाटा रे माखे पकड़ने खे जाल़ बछाई राखेया ए। सेला

6 ओ प्रभु, मैं ताखे बोली राखेया कि तूँई मेरा परमेशर ए;

ओ प्रभु, मेरे गिड़गिड़ाणे रिया तरफा खे त्यान दे!

7 ओ प्रभु परमेशर, ओ मेरे सामर्थी उद्धारकर्ता,

तैं युद्धो रे बखते मेरी रक्षा करी राखी।

8 ओ प्रभु, दुष्टो री इच्छा खे पूरी नि ऊणे दे,

तेसरी बुरी साजिश सफल नि ऊणे दे,

नई तो तेस कमण्ड करना। सेला

9 सेयो दुश्मण जिने आँऊ केरी राखेया

तिना रा सोचेया रा अनिष्ठ तिना रेई सिरो पाँदे पड़ो!

10 तिना पाँदे आगी रे फेऊआ री बरखा ओ!

सेयो आगी बीचे सेटे जाओ!

सेयो एड़े गड्डे रे पड़ो कि सेयो फेर उठी नि सको!

11 दूजेया पाँदे चूठा दोष लगाणे वाल़े सफल नि ओ;

बुराई चगड़ा करने वाल़ेया लोका पाँदे हावी ऊणे दे ओर तिना खे नाश करने दे,

12 ओ यहोवा, माखे परोसा ए कि तूँ दु:खी माणूंआ रा ओर गरीबा रा न्याय चुकाणा।

13 तर्मी लोका तेरी स्तुति करनी;

सेयो तेरे सामणे रणे।