1 ओ परमेशर, मेरिया प्रार्थना रिया तरफा खे त्यान दे

ओर मेरिया बिनतिया खे अणसुणी नि कर!

2 मेरी प्रार्थना सुणी की माखे उत्तर दे,

मां पाँदे आई री मुसीबता रे बार रे सोची की आऊँ बेचैन रऊँआ।

3 कऊँकि मेरे दुश्मण आल्ला-गोल्ला ओर पापी लोक उपद्रव करने लगी रे;

सेयो मां पाँदे दोष लगाओए ओर गुस्से रे आई की माखे सताओए।

4 मेरा मन पीतरे ई पीतरे बऊत दु:खी ए

ओर आऊँ मरने ते डरने लगी रा।

5 आऊँ तो डरो रे मारे थुरने लगी रा

ओर डरो रे मारे मेरे बाल़-बाल़ खड़े ऊईगे रे।

6 तेबे मैं बोलेया कि खरा ऊँदा जे मेरे कबूतरो जेड़े पंख ऊँदे,

तो आऊँ उडी जांदा ओर माखे राम मिलदा!

7 देखो, तेबे तो आऊँ उडदे-उडदे दूर निकल़ी जाणा था

ओर सुनसाण जगा रे आपणा बसेरा करदा।

8 आऊँ छोड़ आपणे बैरिया ते नठी की केथी रणे रिया जगा दे जांदा,

जो एक आँधी तूफानो जेड़ा ए।

9 ओ प्रभु, तिना रा नाश कर ओर तिना री पाषा रे गड़बड़ी पाई दे,

कऊँकि मैं शईरो रे ईंसा ओर चगड़ा देखी राखेया।

10 रात-दिन सेयो तिजी री दवाला पाँदे चढ़ी की चऊँ कनारे कूमोए

ओर तेतेरे पीतरे बुराई ओर चगड़ा करोए।

11 सेयो हर जगा चीजा खे नाश करी देओए।

सेयो बारे चौका पाँदे लोका पाँदे अत्याचार करोए ओर तिना खे तोखा देओए।

12 जे कोई दुश्मण मेरी निंदा करदा,

तो आँऊ तिजी खे सईन करी लंदा;

जे मेरे खलाफ मेरा बैरी उठदा तो मां तेसते लूकी जाणा था।

13 पर से तो तूँई था, जो मां जेड़ा एक माणूं,

मेरा प्यारा दोस्त ओर मेरी जाण-पछयाणी रा था।

14 जेस साथे आसे दोनो जणे आपू बीचे

मीठिया-मीठिया गल्ला करदे आराधना करने वाल़ेया रे चूण्डो साथे परमेशरो रे मन्दरो रे जाऊँ थे।

15 मेरे दुश्मणा खे अचाणक मौत आई जाओ;

सेयो जिऊँदे ई अधलोको रे उतरी जाओ,

कऊँकि बुराई तिना रे कअर ओर तिना रे मनो रेईए।

16 पर मां तो परमेशरो खे मतादा रिया तँईं आका पाणिया

ओर प्रभुए आऊँ बचाई लणा।

17 मां साँजा, प्यागा ओर त्याड़िया तिंऊँ पईरे दु:खो दे दुहाई देणी

ओर कणदे रणा ओर परमेशरो मेरी आवाज सुणी लणी।

18 युद्धो दे प्रभुए मेरी रक्षा करनी;

जेबे मेरे खलाफ बऊत सारे दुश्मण खड़े ऊणे,

तेस मेरे प्राण नाश ऊणे ते बचाणे।

19 परमेशर जो शुरूए ते सिंहासणो पाँदे बैठेया राए,

मेरी प्रार्थना सुणी की तेस तिना खे उत्तर देणा। सेला,

कऊँकि तिना लोका रे दिलो रे कोई बदलाव नि ए

ओर ना सेयो परमेशरो ते डरदे।

20 मेरे साथिये आपू साथे शान्तिया रा मेल राखणे वाल़ेया पाँदे बी आथ चकी राखेया,

तिने आपणा वादा तोड़ी ता रा।

21 तेसरे मुंए रिया गल्ला मां सामणे नऊणिंया जेड़िया चिकणिया ओ थिया,

पर फेर बी तेसरे मनो रे मेरे खलाफ ईर्ष्या थी;

तेसरे बोल तेलो ते जादा चिकणे तो थे, पर फेर बी सेयो नांगी तलवार थे।

22 आपणा बोज प्रभुए पाँदे पाई दे;

तेस तूँ सम्बाल़ना,

तेस तार्मिक माणूं कदी नि टल़ने देणे।*

23 पर ओ परमेशर, तूँ तिना अत्यारेया ओर चूठेया लोका खे नाशो रे गड्डे रे सेटी दे;

अत्यारे ओर कपटी माणूं आपणी आदिया उम्रा तक बी जिऊँदे नि रणे।

पर मां तां पाँदे ई परोसा राखणा।