1 ओ यहोवा, मां पूरे दिलो ते तेरा तन्यवाद करना;

मां दूजेया देवतेया रे सामणे तेरी जयजयकारा रा गीत गाणा।

2 मां तेरे पवित्र मन्दरो रिया तरफा खे मूँ करी की माथा टेकणा

ओर मां तेरी करूणा ओर सच्चाईया रिया तँईं तेरे नाओं री सराईणा करनी;

कऊँकि तैं आपणे वचनो खे आपणे बड़े नाओं ते जादा महत्व देई राखेया।

3 जेस दिने मैं ताखे आका पाईया, तेस ई दिने तैं मेरी सुणी ली

ओर तैं माखे तागत देई की मेरी ईम्मत बढ़ाई।

4 ओ प्रभु, तरतिया रे सारे राजेया तेरा तन्यवाद करना,

कऊँकि तिने तेरे वादे सुणी राखे;

5 सेयो यहोवे रे महान प्रताप ओर

जो काम यहोवे कित्तेया तीजी खे तिना गीत गायी की जयजयकार करनी।

6 तेबे बी प्रभु, तूँ ऊच्चे सिंहासणो पाँदे बैठेया राए,

तेबे बी तूँ नम्र माणूंआ रिया तरफा खे देखोआ,

पर कमण्डिया खे दूरा तेई पछयाणी लओआ।

7 जेबे आऊँ मुसीबता ते किरेया दा ऊँआ, तो तुसे माखे बचाई की राखोए।

तुसे मेरे गुस्से ते परे दुश्मणा रा बरोद करो ओर आपणियां तागती ते माखे बचाओ।

8 प्रभुए मेरिया तँईं आपणे वादे रे मुताबिक सब कुछ पूरा करना; ओ प्रभु, तेरी करूणा सदा री ए!

जो काम तैं शुरू कित्तेया, तेसखे एबे तूँ खत्म करी दे।