1 सर्वशक्तिमान परमेशरे बोली राखेया,

ओर पूर्वो ते लई की पच्छमा तक तरतिया रे सब लोक बुलाई राखे।

2 सिय्योनो ते जो बऊत जादा सुन्दर ए,

परमेशरे आपणा तेज दखाई राखेया।

3 म्हारा परमेशर आऊणा ओर चुपचाप नि रणा,

प्रचण्ड आग तेसते आगे-आगे पस्म करदे जाणी ओर तेसरे चऊँ कनारे बड़ा पारी तूफान चलणा।

4 परमेशरो सर्ग ओर तरती गवा रे रूपो रे राखणे, कि सेयो तेसखे आपणी प्रजा रा न्याय करदे ऊए देखो।

5 "मेरे पग्ता खे मांगे कट्ठे करो,

जिने बलिदान चढ़ाई की मां साथे वाचा बानी राखी!"

6 स्वर्गो परमेशरो रा तर्मी ऊणे रा प्रचार करना

कऊँकि परमेशर आपू ई न्याय करने वाल़ा ए।* सेला

7 तेस बोलणा, "ओ मेरे लोको, सुणो! आऊँ तुसा खे बोलूँआ! ओ इस्राएली लोको,

आऊँ तुसा रे बारे दे गवाई देऊँआ! आऊँ परमेशर, तुसा रा परमेशर ए!

8 आऊँ तां पाँदे तेरी मेलबलिया रे बारे दोष नि लगांदा,

तेरे होमबलि तो हमेशा मेरिया तँईं चढ़ोए।

9 मां ना तो तेरे कअरो ते बल़द

ओर ना तेरिया गवाईणी ते बाकरे बल़ी करने खे लणे।

10 कऊँकि बणो रे सारे जीव-जंतु ओर ह्जारो पाह्ड़ो रे जानवर मेरे ईए।

11 पाह्ड़ो रे सारे पंछिया खे आऊँ जाणूंआ

ओर मैदानो रे चलणे-फिरने वाल़े जानवर मेरे ईए।

12 जे आऊँ पूखा ऊँदा, तो ताखे नि बोलदा;

कऊँकि दुनिया ओर जो कुछ तिदे ए,

से मेरा ईए।*

13 क्या आऊँ बल़दो रा मास खाऊँ या बाकरेया रा खून पीऊँ?

14 परमेशरो खे तन्यवादो रा बलिदान ई चढ़ा

ओर परमपरदानो रिया तँईं आपणी मान्नता पुरिया कर;*

15 ओर मुसीबता रे बखते माखे बुला,

मां तूँ मुसीबता ते छुड़ाणा ओर तां मेरी महिमा करनी।"

16 पर दुष्टो खे परमेशर बोलोआ, "ताखे मेरी बिदिया रा बखाण करने ते क्या काम

ओर तूँ मेरी वाचा री चर्चा कऊँ करेया?

17 तूँ तो मेरी शिक्षा ते बैर करेया

ओर मेरी आज्ञा खे नि मानदा।

18 जेबे तैं चोर देखेया, तेबे तेसरी संगतिया ते खुश ऊआ

ओर व्याभिचारिया साथे शामिल ऊआ।

19 तूँ बुराई करने खे सदा त्यार रएया

ओर ना ई चूठ बोलणे दे शर्म करदा।

20 तूँ आपू आपणे पाई-बईणा पाँदे आरोप लगाणे

ओर तिना साथे गल़ती टोल़ने खे त्यार रएया।

21 ये काम तैं कित्तेया ओर मैं कुछ नि बोलेया;

इजी री खातर तैं समजेया कि परमेशर बिल्कुल मां जेड़ा ए।

पर एबे मां तूँ समजयाणा ओर तां सामणे सब कुछ स्पष्ट करना।

22 ओ परमेशरो खे पूलणे वाल़ेयो!

एसा गल्ला खे ठीक टंगो रे समजी लओ,

केथी एड़ा नि ओ कि आऊँ तुसा खे नाश करी देऊँ

ओर कोई तुसा खे बचाणे वाल़ा नि ओ!

23 तन्यवादो रे बलिदानो खे चढ़ाणे वाल़ा मेरा आदर करोआ

ओर जो मेरी गल्ल मानोआ से मां जरूर बचाणा।"*