अगुवाई ओर रक्षा रिया तँईं प्रार्थना
दाऊदो रा पजन
1 ओ प्रभु आऊँ तां पाँदे ई परोसा करूँआ।25:1 86:4, 143:8
2 ओ मेरे परमेशर, मैं तांई पाँदे परोसा राखी राखेया,
माखे शर्मिंदा नि ऊणे देया;
मेरे दुश्मण मां पाँदे विजय नि पाई सको।
3 बल्कि जितणे लोक तेरा इन्तजार करोए,
तिना बीचा ते कोई बी शर्मिंदा नि ऊणा,
पर जो बिना बजा ते विश्वासघात करोए
सेयो ई शर्मिंदा ऊणे।
4 ओ यहोवा, आपणी बाट माखे दखा;
माखे तिजी पाँदे चलणा सखा।
5 माखे आपणी सच्चाईया रिया बाटा पाँदे चलणा सखा,
कऊँकि तूँई मेरा परमेशर ए जो माखे बचाओआ।
माखे सदा तेरा ई परोसा रओआ।
6 ओ प्रभु, आपणी दया ओर करूणा खे याद कर;
कऊँकि तूँ तिना खे जुगो-जुगो ते प्रकट करदा आई रा।
7 ओ प्रभु, आपणी पलाईया रिया बजा ते
मेरी जवानिया रे पाप ओर पाप याद नि कर;
आपणी करूणा रेई मुताबिक तूँ माखे याद कर।
8 कऊँकि तूँ यहोवा तर्मी ओर पला ए;
तूँ पापी माणूंआ खे बी सिखाए आ कि तेरिया बाटा दे किंयाँ चलणा ए।
9 से नम्र लोका खे सई बाटा दे चलणा सिखाओआ,
ओर तिना खे आपणी इच्छा बी सिखाओआ।
10 जो प्रभुए रे वादे ओर चतौणिया खे मानोए,
तिना खे प्रभुए रिया सारिया बाटा करूणा ओर सच्चाईया रिया ए।25:10 यूह. 1:17
11 ओ यहोवा, तूँ आपणे वादे खे याद कर,
मेरे पाप जो बऊत ए, माफ कर।
12 जे कोई प्रभुए रा आदर करोए,
तो प्रभु तेस माणूंए खे जीवन जिऊणे रा सई तरीका बताओआ।
13 से हमेशा रजे दे रणे
ओर तेसरा वंश तरतिया पाँदे अधिकारी ऊणा।
14 प्रभु आपणे पग्ता खे सई बाट दखाओआ,
ओर तेस तिना खे आपणी वाचा रा पाल़न करना सिखाणा।25:14 इफि. 1:9, इफि. 1:18
15 मां हर बखते मतादा रिया तँईं परमेशरो रिया तरफा खे देखणा,
ओर से माखे खतरे ते बचाओआ।25:15 पजन 141:8
16 ओ प्रभु, मेरिया तरफा खे फिरी की मां पाँदे दया कर;
कऊँकि आऊँ कल्ला ओर दु:खी ए।
17 मेरे मनो रा क्ल़ेश बढ़ी गा रा, माखे मेरे दु:खो ते छुड़ाई लओ।
18 मेरे दु:ख ओर कष्टा खे देख
ओर मेरे सारे पाप माफ कर।
19 मेरे दुश्मणा खे देख कि सेयो किंयाँ बढ़ीगे रे
ओर मां साथे बड़ी पारी दुश्मणी राखोए।
20 मेरे प्राणो री रक्षा कर ओर मेरा उद्धार कर,
माखे शर्मिंदा नि ऊणे दे;
कऊँकि आऊँ तेरी शरणा रे आई रा।
21 ओ यहोवा, मेरिया रक्षा रिया तँईं आऊँ तां पाँदे परोसा करूँआ।
मेरा त्यान राख, कऊँकि आऊँ ईमानदार ओर ठीक ए।
22 ओ यहोवा, आपणे इस्राएली लोका खे तूँ सबी मुसीबता ते छुड़ाई लओ।