पजन 83

इस्राएलो री जीता रिया तँईं प्रार्थना

आसापो रा गीत

1 ओ परमेशर मौन नि रओ;

ओ परमेशर चुप नि रओ, ओर ना ई शांत रओ!

2 देख! तेरे दुश्मण अंगामा मचाणे लगी रे;

ओर जो तांते बैर राखोए, सेयो बरोद करोए।

3 सेयो उशयारिया साथे तेरी प्रजा रे खलाफ षड़यन्त्र रचणे लगी रे,

ओर जिना री तूँ रक्षा करेया तिना रे खलाफ आपू बीचे सम्मति करोए।

4 तिने एकी दूजे खे बोलेया, "आओ, आसे तिना खे एड़ा नाश करूँए कि राज्य ई खत्म ऊई जाओ;

ओर इस्राएलो रा नाओं आगो खे याद नि रओ।"

5 तिने एक मन ऊई की सम्मति कित्ती,

ओर तेरे ई खलाफ वाचा बानी राखी।

6 सेयो दुश्मण यो ए जेड़े एदोमो रे तम्बूए वाल़े

ओर इश्माएली, मोआबी, हग्री,

7 गबाली, अम्मोनी, अमालेकी

ओर सोर समेत पलिश्ती ए।

8 अश्शूरी लोक बी इना साथे मिली गे रे;

ओर लूतो रे वंशो वाल़े अम्मोनी ओर मोआबी बी इना रिया तरफा खे मिली गे रे। सेला

9 इना साथे एड़ा बर्ताव कर जेड़ा तैं मिद्यानिया साथे,

ओर कीशोन नाल़े रे सीसरा ओर याबीनो साथे कित्तेया था,*83:9 न्यायियो 6-8

10 जो एनदोरो रे नाश ऊए,

ओर जमीना रिया तँईं खाद बणीगे।*83:10 सेयो कब्रा दे नि दबाए, पर जेती पड़ी रे थे तिना रिया लाशा तेथी जमीना दे पड़िया दिया रईया

11 तिना रे परदाना साथे तेड़ा ई करो जो तुसे ओरेब ओर जेबो*83:11 ओरेब ओर जेब दो मिद्यानी परदान थे जो जिन्हें एप्रैमिये काईते, न्यायियो 7:24-25 साथे कित्तेया था;

जेबह ओर सल्मुन्ना जेड़ा तिना रे सबी परदाना खे अराई दे,*83:11 न्यायियो 8:21

12 जिने बोलेया था, "आओ, आसा से जमीन आपणे कब्जे दे करी लणी जो परमेशरो री ए।"

13 ओ परमेशर, इना खे पऊण-चूखाने रिया तूड़ा जेड़े,

या पऊणी साथे ड्वाए रे पूए जेड़ा करी दे।

14 तेसा आगी जेड़े जो बणो खे फूकी की स्वा करी देओई,

ओर तेसा लूपिया जेड़ी जो पाह्ड़ा खे फूकी देओई,

15 तूँ इना खे आपणे तूफानो साथे नठाई दे,

ओर तेरे पऊण-चूखाने साथे यो कबराई जाओ!

16 ओ यहोवा, दुश्मणा खे बऊत शर्मिंदा कर,

ताकि सेयो ये मानी लओ कि तूँ बऊत तागतबर ए।

17 इना खे सदा-सदा खे शर्मिंदा कर ओर डराई दे,

यो बेज्जत ऊई जाओ, ओर इना रा नाश ऊई जाओ,

18 जेते कि यो जाणी लओ कि बस तूँई जेसरा नाओं प्रभु ए,

ओर तूँ ई सारी तरतिया पाँदे परमपरदान परमेशर ए।