जीत आसिल ऊणे पाँदे तन्यवादो री प्रार्थना
दाऊदो रा पजन
1 यहोवे री स्तुति करो, मेरी रक्षा करने वाल़ा! से माखे युद्ध करने रिया तँईं सिखाओआ ओर त्यार करोआ।
2 से मेरी रक्षा करने वाल़ा ए, मेरी रणे री जगा ओर मेरा उद्धार करने वाल़ा ए,
जेस पाँदे आऊँ बचणे रिया तँईं परोसा करूँआ।
से देशो-देशो रे लोका खे मेरे वशो रे करी देओआ।
3 ओ प्रभु, माणूं क्या ए कि तूँ तेस पाँदे त्यान देओ,
या आदमी क्या ए कि तूँ तेसरी कुछ चिन्ता करो?
4 माणूं साओ जेड़ा ए,
तेसरे उम्रा रे दिन टल़दी ऊई छांयी जेड़े ए।
5 ओ यहोवा, सर्गो खे पड़दे जेड़ा फाड़ी की थाले उतरी की आओ!
बड़े-बड़े पाह्ड़ा खे छूँ तेबे तिना ते तुआँ उठणा!
6 तूँ बिजल़ी कड़कड़ाई की मेरे दुश्मणा खे तित्तर बित्तर करी दे,
आपणे तीर चला, ताकि सेयो कबराई जाओ!
7 तूँ ऊच्चिया जगा ते आपणे आथ बढ़ाई की माखे गईरे समुद्रो ते बारे निकयाल़,
मतलब परदेशिया रे वशो ते माखे छुड़ा।
8 सेयो कदी सच्च नि बोलदे,
ओर सेयो कसम खाई की बी चूठ बोलोए।
9 ओ यहोवा, मां तेरिया तँईं नवां गीत गाणा;
मां दस तारा वाल़ी सारंगी बजाई की तेरा पजन गाणा।144:9 प्रकाशित 5:9, प्रकाशित 14:3
10 तूँई राजेया खे जीत दलाओआ
ओर आपणे दास दाऊदो खे तलवारी री मारा ते बचाएया।
11 प्रभु, माखे बारे निकयाल़
ओर परदेशिया रे वशो ते छुड़ाई लओ,
सेयो कदी सच्च नि बोलदे,
ओर सेयो कसम खाई की बी चूठ बोलोए।
12 म्हारे माठे जवानिया रे बखते पौधेया जेड़े बढ़े रे ओ
ओर म्हारिया बेटिया तिना कुणे वाल़े खम्बेया जेड़िया ऊई जाओ,
जो मईलो खे बणाए जाओए;
13 म्हारे पण्डार-कअर हर किस्मा रे नज्जो साथे परे रओ
ओर म्हारिया पेडा-बाकरिया म्हारे मैदानो रे ह्जारो-ह्जार बच्चे पैदा करो;
14 जेबे म्हारे बल़द खूब लदे रे ओ;
जेबे आसा रे ना कोई बिग्न ओ
ओर ना ई म्हारा केथी युद्धो रे जाणा ओ
ओर ना म्हारे चौका रे रोणे री आवाज सुणो!
15 एड़े सुख-चैना साथे रणे वाल़े लोक तन्य ए!
सेयो लोक तन्य ए जिना रा परमेशर प्रभु ए!