पजन 6

दया रिया तँईं प्रार्थना

बजाणे वाल़े परदानो रिया तँईं : तारा वाल़े बाजे साथे। खर्ज रागो रे, दाऊदो रा पजन

1 ओ प्रभु, तूँ माखे आपणे गुस्से रे नि चिड़क,

ना माखे ताड़ना दे।

2 ओ प्रभु, मां पाँदे दया कर, कऊँकि आऊँ कमजोर ऊईगा रा,

प्रभु, माखे तागत दे, आऊँ पुरिया तरआ ते थकी गा रा ए।

3 आऊँ बऊत जादा परेशान ए।

कदुए तक, ओ प्रभु, तां मेरी मताद करने खे इन्तजार करदे रणा?*6:3 यूह. 12:27

4 यहोवा, आ ओर माखे बचाई लो।

माखे बचा कऊँकि तूँ पूरे दिलो ते मांते प्यार करेआ।

5 जे आऊँ मरी जाऊँगा तो तेबे आऊँ ताखे याद पनि करी सकदा।

कोई पनि तिना रिया कब्रा गे तेरा तन्यवाद करी सकदा!

6 आऊँ रोंदे-रोंदे थकी गा,

आऊँ आपणा मांजा आसूआ साथे सेड़ुआं;

हर राती मेरा बछौणा आसूआ साथे सिजी जाओआ।

7 मेरिया आखी दु:खो साथे बैठी गी रिया

ओर मेरे सताणे वाल़ेया रिया बजा ते सेयो तुँदल़िया पड़ी गी रिया।

8 ओ सब अनर्थ करने वाल़ेयो! मांते दूर रओ,

कऊँकि प्रभुए मेरे रोणे री आवाज सुणी ली री।*6:8 मत्ती 7:23, लूक. 13:27

9 प्रभुए मेरा गिड़गिड़ाणा सुणी राखेया;

तेस मेरी प्रार्थना ग्रहण बी करनी।

10 मेरे सारे दुश्मण शर्मिंदा ऊणे ओर बऊत कबराणे;

ओर सेयो अचाणक पुरिया तरआ ते बेज्जत ऊई की नठी जाणे।