1 जातिया-जातिया रे लोक परमेशरो ते गुस्से कऊँ ओए?

लोक आपणे बेकारो रिया योजना कऊँ बणाओए?*

2 तरतिया रे तिना सबी जातिया रे राजेया यहोवा ओर तेसरे चूणे दे राजे रे खलाफो दे

एक मन ऊई कि बिद्रोह कित्तेया ओर आपू बीचे बोलणे लगे,*

3 "आओ, आसे आपणे आपू खे प्रभु ओर तेसरे राजे ते छुट्टी जाईए

जो आसा पाँदे राज्य ओर कब्जा करोए।"

4 स्वर्गो दे विराजमान यहोवा आपणे सिंहासनो पाँदे बैठी रा,

तेसखे आसी आई ओर तिना रिया योजना रा मजाक उडाया।

5 तेबे प्रभुए तिना खे गुस्से दे चतौणी देणी,

ओर बऊत गुस्से दे ये बोली की सेयो डराणे,

6 परमेशरे बोलेया, "आऊँ आपणे पवित्र पाह्ड़ सिय्योनो री राजगद्दिया पाँदे तो

आपणे चूणे रे राजे खे बठयाल़ी चुकेया रा।"

7 राजे बोलेया, "मां सेयो वचन सबी खे बताणे जो माखे यहोवे बताई राखे,

तूँ मेरा पाऊ ए, आजो ते आऊँ तेरा बाओ आ।*

8 तूँ मांते माँग ओर मां देशो-देशो रे लोक तेरी जायदात ऊणे खे,

ओर पूरी तरती तेरे अक्को दे करी देणी।*

9 तां सेयो पुरिया तरआ ते अराई देणे, तां सेयो नाश करी देणे,

जिंयाँ लोक लोए रे डण्डे साथे माट्टिया रे पांडेया खे चूर-चूर करोए।"*

10 इजी री खातर एबे, ओ राजेयो, अक्लमंद बणो।

ओ तरतिया रे न्यायियो! सम्बल़ी जाओ।

11 डरदे ऊए प्रभुए री आराधना करो ओर थरथरांदे ऊए मगन ओ।*

12 तेसरे पाऊए रे सामणे नम्र बणी की प्रणाम करो! जे तुसे एड़ा नि करदे, तो यहोवा बऊत गुस्से ऊणा,

ओर तेस अचाणक तुसे काई देणे, ये मत सोचणा कि तेस बऊत छोड़ दखाई देणा कि से बऊत गुस्से दे ए!

पर से तिना सबी लोका साथे बऊत खुश ए जो तिना ते रक्षा करने रा अनुरोद करोए।