देशो रे छुटकारे रिया तँईं प्रार्थना
आसापो रा पजन
1 ओ परमेशर, दूजी जातिया वाल़ेया तेरिया जगा पाँदे कब्जा करिता दा,
तिने तेरा पवित्र मन्दर अशुद्ध करिता दा,
तिने यरूशलेम शईर पुरिया तरआ ते नाश करिता दा ए।79:1 लूक 21:24, प्रकाशित 11:2
2 तिने तेरे दासा रिया लाशा सर्गो रे पंछिया रा खाणा बणने रिया तँईं
ओर तेरे पग्ता रा मास बणो रे डांगरा खे खाणे रिया तँईं देईता।
3 तिने तेरे लोका रा खून यरूशलेमो रे चऊँ कनारे पाणिए जेड़ा बाह्या,
ओर तिना खे माट्टी देणे वाल़ा कोई नि था।79:3 प्रकाशित 16:6
4 पड़ोसिया बीचे म्हारी निंदा ऊई;
चऊँ कनारे रणे वाल़े आसा पाँदे आसोए ओर म्हारा मजाक ऊड़ाओए।
5 ओ प्रभु, कदुओ तक? क्या तां लगातार गुस्सा करदे रणा?
कदुओ तक आगी जेड़ी जल़न तांदे पड़कदी रणी?
6 जो जातिया ताखे नि जाणदिया,
ओर जिना राज्य रे लोक तांते प्रार्थना नि करदे,
तिना पाँदे ई आपणा सारा गुस्सा पड़का।79:6 1 थिस्सलुनी 4:5, 2 थिस्सलुनी 1:8
7 कऊँकि तिने तेरे आपणे इस्राएली लोक काईते;
ओर तिने तेरा देश नाश करिता।
8 म्हारे बुजुर्गा रे पापो रे कामा खे म्हारे खलाफ याद नि कर;
तेरी दया आसा पाँदे चटचारे ओ, कऊँकि आसे बऊत बुरिया दशा रे पड़ी रे।
9 ओ म्हारे उद्धारकर्ता परमेशर, आपणे नाओं री महिमा रिया तँईं म्हारी मताद कर;
ओर आपणे नाओं रे मुताबिक आसा खे छुड़ाई की म्हारे पाप टखी दे।
10 ताकि दूजिया जातिया रे लोक बोली नि सको कि तिना रा परमेशर केई ए?
तेरे दासा रे खूनो रा बदला दूजिया जातिया ते आसा सामणे लया जाओ।79:10 प्रकाशित 6:10, प्रकाशित 19:2
11 तेरे सामणे कैदिया रा कणना तेरे कानो तक पऊँचो;
आपणी महान सामर्था रे जरिए जो घात ऊणे वाल़े ए तिना खे बचा।
12 ओ यहोवा, दूजिये जातिये जो तेरी बेज्जती करी राखी ए,
तिजी रा सातगुणा बदला तिना खे दे!
13 तेबे आसा जो तेरी प्रजा ओर तेरी चराईया रिया पेडा ए,
तेरा तन्यवाद सदा करदे रणा;
ओर पीढ़िया ते पीढ़िया तक तेरा गुणगाण सदा करदे रणा।