पजन 149

इस्राएल परमेशरो री स्तुति करो

1 प्रभुए री स्तुति करो! प्रभुए रिया तँईं नवां गीत गाओ,

पग्ता री सभा रे प्रभुए री स्तुति करो!*149:1 प्रकाशित 5:9, प्रकाशित 14:3

2 इस्राएली लोक आपू खे बनाणे वाल़ेया रिया बजा ते खुश ओ,

सिय्योनो रे रणे वाल़े आपणे राजे रिया बजा ते प्रभुए रे मगन ओ!

3 इस्राएली लोको नाचदे ऊए प्रभुए रे नाओं री स्तुति करो

ओर डफली ओर बीणा बजांदे ऊए तेसरा पजन गाओ!

4 यहोवा आपणियां प्रजा ते खुश रओआ;

तेस नम्र लोका रा उद्धार करी की तिना री शोभा बढ़ाओआ।

5 पग्त लोक प्रभुए री महिमा रिया बजा ते खुश ओ

ओर सेयो आपणे बछौणे पाँदे लेटे रे बी जयजयकार करो।

6 तिना रे गल़े ते परमेशरो री तारीफ ओ

ओर तिना रे आथो रे दोधारी तलवार रओ,

7 ताकि सेयो जातिया-जातिया ते बदला लई सको

ओर राज्य-राज्य रे लोका खे ताड़ना देओ,

8 सेयो तिना रे राजेया खे साँगल़ो साथे

ओर तिना रे जाणे-माणे रे मर्दा खे लोए रिया बेड़िया साथे जकड़ी की राखो,

9 ओर तिना खे ठराई री सजा देओ!

प्रभुए रे सबी पग्ता रा एड़ा ई मान-सम्मान ऊणा।

प्रभुए री स्तुति करो।