सिर्फ एक ई सच्चा परमेशर
1 ओ यहोवा, म्हारी नि, बल्कि तेरी ई जयजयकार ओ! सारी महिमा जोगा तूँ ई ए,
कऊँकि तेरी करूणा ओर सच्चाई सदा री ए।
2 देशो-देशो रे लोक कऊँ आसा ते एड़ा पूछणे लगो, "तुसा रा परमेशर केई आ?"
3 म्हारा परमेशर तो स्वर्गो दे ए;
तिने जो चाया, सेई काम तिने कित्तेया।
4 पर दूजिया जातिया रे देवता तो सूईने-चाँदिए ते बणी रिया मूर्तिया ए,
जो माणूंए आपू बणाई राखिया ए।
5 तिना रे मूँ तो अए, पर सेयो बोली नि सकदिया;
तिना रे आखी तो अए, पर सेयो देखी नि सकदिया।
6 तिना रे कान तो अए, पर सेयो सुणी नि सकदिया;
तिना रे नाक बी अए, पर सेयो सींगी नि सकदिया।
7 तिना रे आथ तो अए, पर सेयो छुँईं नि सकदिया;
तिना रे पैर तो अए, पर सेयो चली नि सकदिया
ओर सेयो आपणे गल़े ते कोई बी शब्द नि निकयाल़ी सकदिया।
8 जो तिना खे बणाओए;
सेयो तिना ई मूर्तिया जेड़े निर्जीव ए
ओर तिना पाँदे परोसा राखणे वाल़े बी सब तेड़े ई ऊई जाणे।
9 ओ इस्राएली लोको, प्रभुए पाँदे परोसा राखो!
सेई तुसा रा मताद करने वाल़ा ओर रक्षक ए।
10 ओ हारूणो रे वंशो रे पुरोईतो, प्रभुए पाँदे परोसा राखो!
सेई तुसा रा मताद करने वाल़ा ओर रक्षक ए।
11 ओ प्रभुए रे पग्तो, प्रभुए पाँदे परोसा राखो!
सेई तुसा रा मताद करने वाल़ा ओर रक्षक ए।
12 प्रभुए आसे याद करी राखे; तेस आसा खे आशीष देणी;
तेस इस्राएलो रे कराने खे आशीष देणी;
तेस हारूणो रे वंशो रे पुरोईता खे आशीष देणी।
13 प्रभुए आपणे पग्ता खे,
छोटेया-बड़ेया सबी खे आशीष देणी।115:13 पजन 128:1
14 प्रभु तुसा खे
ओर तुसा रे बाल-बच्चेया खे बी सदा बढ़ांदा जाओ!
15 प्रभु जो सर्ग ओर तरतिया खे बनाणे वाल़ा ए,
तेसरिया तरफा ते तुसे आशीष पाओ।
16 स्वर्ग तो प्रभुए राए,
पर तरती तिने माणूंआ खे देई राखी।
17 मरे रे माणूं यहोवे री स्तुति नि करी सकदे
कऊँकि सेयो मृत्यु-लोको रे खामोश ऊई की पड़ी रे,
18 पर आसा लोका यहोवे खे एबुए ते लई की
सदा तक तन्य बोलदे रणा।
यहोवे री स्तुति करो!