1 ओ यहोवा, तैं आऊँ परखी की जाणी ला रा।*

ओर तुसा खे मेरे बारे दे सब कुछ पता ए

2 तूँ मेरा उठणा-बैठणा जाणेया

ओर मेरिया सोचा खे दूरा तेई समजी लया।

3 तूँ मेरे चलणे ओर राम करने रिया जगा रा ठीक-टंगो रे पता लगाई लया

ओर तूँ मेरे पूरे चाल-चलणो रा पेत जाणेया।

4 ओ प्रभु, मेरे मुंए री एड़ी कोई बी गल्ल नि ए

जेतेखे तूँ पुरिया तरअ ते नि जाणदा ओ।

5 तूँ मेरे चऊँ कनारे हर तरफा खे आ;

तूँ आपणियां तागती ते मेरी रक्षा करेया।

6 प्रभु, ये ज्ञान माखे बऊत कठण ए,

ये बऊत ई गईरा ज्ञान ए, जो मेरिया समजा ते बारे ए।

7 आऊँ तेरिया आत्मा ते लग ऊई की केई जाऊँगा?

आँऊ तेरिया मौजुदगिया ते केई नठूँ?

8 जे आऊँ सर्गो पाँदे चढ़ूँ, तो तूँ तेती ए!

जे आऊँ आपणा बछौणा मरेया री दुनिया रे बछाऊँ, तो तेती बी तूँई ए!

9 जे आऊँ उडी की पूर्व दिशा रिया तरफा खे

समुद्रो ते पार कलाणियां दे बसूँ,

10 तो तेती बी तां मेरी अगुआई करनी,

ओर तां मेरी मताद करनी,

11 जे आऊँ बोलूँ कि मां न्हेरे लूकी जाणा

ओर मेरे चऊँ कनारला प्रयासा रात ऊई जाओ,

12 तेबे बी आँऊ न्हेरे तांते नि लूकी सकदा,

कऊँकि राती बी दिनो रे बराबर प्रयासा देणा,

ताखे तो न्हेरा ओर प्रयासा दोनो एक बराबर ए।

13 मेरे मनो रा स्वामी तो तूँई ए,

मेरिया माया रे गर्भो रे तैंई आँऊ बणाई राखेया।

14 मां तेरा तन्यवाद करना, कऊँकि आऊँ खतरनाक ओर अद्भुत तरीके रे रची राखेया।

तेरे काम कितणे अचम्बे रे ए ओर आऊँ इजी खे ठीक-टंगो रे जाणूंआ।*

15 जेबे मेरी आड्डिया बणने लगी रिया थिया, तो त्यानो साथे आपणियां माया रे पेटो दे राखणे लगी रे थे,

जेबे आऊँ तेती गुप्त रूपो दे बढ़ने लगी रा था, तो तुसे जाणो थे कि आऊँ तेती था,

16 तेरिये आखी मेरा बांगा-टेडा शरीर बणदा देखेया

ओर मेरे सारे अंग जो हर दिन बणदे जाओ थे,

सेयो रचे जाणे ते पईले, तेरिया कताबा रे लिखी राखे थे।

17 ओ परमेशर, तेरे बिचार मेरिया तँईं कितणे कीमती ए!

तिना री गिणतिया रा जोड़ कितणा बड़ा ए!

18 जे आऊँ तिना खे गिणदा तो सेयो बालूए रे कणा ते बी जादा ऊणे थे।

जेबे आऊँ जागूँआ, तेबे बी तां साथे रऊँआ।

19 ओ परमेशर, पक्का तां दुष्ट माणूं काई देणे!

ओ अत्या करने वाल़ेयो, मांते दूर ऊई जाओ!

20 कऊँकि सेयो तेरी चर्चा उशयारिया रे करोए,

तेरे दुश्मण तेरा नाओं चूठिया गल्ला रे लओए।

21 ओ प्रभु, क्या आसे तेरे बैरिया साथे बैर नि करुँ,

ओर तेरे बरोदिया साथे क्या आँऊ दुश्मणी नि राखूँ?*

22 आ, आऊँ तिना साथे दिलो ते कृणा करूँआ,

आऊँ तिना खे आपणा दुश्मण समजूँआ।

23 ओ परमेशर, माखे परख ओर मेरा दिल पछयाण, माखे जांची-परखी लओ!

ओर मेरे बचारा खे जाणी लओ!

24 ओर देख कि मांदे कोई बुरी चाल तो नि ए,

प्रभु, माखे सदा रिया बाटा रे लई चल!